ఎన్టీఆర్ కు జరిగింది-నాకు జరగకూడదు: నాయుడు

Posted: 05/31/2014 02:37 PM IST

Minister venkaiah naidu fire on bjp leaders

కేంద్రమంత్రిగా బాధ్యతలు స్వీకరించిన తర్వాత బీజేపీ జాతీయ నేత వెంకయ్యనాయుడు తొలిసారి హైదరాబాదుకు వచ్చారు. ఎయిర్ పోర్టులో ఆయనకు రాష్ట్ర బీజేపీ అగ్రనేతలు, కార్యకర్తలు ఘన స్వాగతం పలికారు. అయితే ఇక్కడే కొద్ది సేపు హైదరాబాదులోని కార్యకర్తల తో సమావేశంలో అయ్యారు.

కేంద్ర మంత్రి వెంకయ్యనాయుడు కార్యకర్తలతో తన ఆనందాన్ని పంచుకున్నారు. తనకు అత్యంత ఇష్టమైన వెంకటేశ్వరస్వామిని దర్శించుకునేందుకు వచ్చానని వెంకయ్యనాయుడు తెలిపారు. తనను కలిసేందుకు అందరూ ఆసక్తి చూపిస్తున్నారని అన్నారు. అందరికీ అభినందనలని, తాను చాలాసేపు ఇక్కడే ఉంటాను కనుక ఎవరూ తోసుకోవద్దని ఆయన సూచించారు.

అయితే ఈ మధ్య అందరూ కాళ్లకు మొక్కుతున్నారని, అలా మొక్కవద్దని ఆయన సూచించారు. తాను దేవుడి తరువాత దేవుళ్లుగా భావించే వాజ్ పేయి, అద్వానీ కాళ్లకు మొక్కలేదని ఆయన తెలిపారు. అలా కాళ్లకు మొక్కే వాళ్లంతా తరువాత కాళ్లు లాగేవారేనని అన్నారు. గతంలో ఎన్టీఆర్ విషయంలో అది రుజువైందని ఆయన గుర్తు చేశారు.

ఈ సారి దక్షిణాదిన 39 స్థానాలు గెలిచి బీజేపీ సత్తా చాటిందని ఆయన తెలిపారు. ఆంధ్రప్రదేశ్ లో బీజేపీ పార్టీ ఉందని చాటి చెప్పిన, అందుకు కారణమైన ప్రతి కార్యకర్తకు ధన్యవాదాలు అని తెలిపారు. దేశం నిండా సవాళ్లు ఉన్నాయని అన్నారు. వాటిని సమర్థవంతంగా ఎదుర్కొని దేశాన్ని ముందుకు తీసుకెళ్లాల్సిన అవసరం ఉందని ఆయన పిలుపునిచ్చారు.

ఎన్నికలు అయిపోయాయి... ఇంకా విద్వేషాలు రేకెత్తించాల్సిన అవసరం లేదని అన్నారు. తాను మొదట భారతీయుడిని, ఆ తరువాత తెలుగు వాడినని... భాష వేరైనా, యాస వేరైనా మనం అన్నదమ్ములమని ఆయన గుర్తు చేశారు. మనలో మనం కొట్టుకోవడం కంటే సిగ్గుచేటైన విషయం మరొకటి లేదని ఆయన అన్నారు.