సోనియా తెలంగాణా ప్రజలకు క్షమాపణ చెప్పాలి-కెటిఆర్

Posted: 04/16/2014 02:49 PM IST

సోనియా గాంధీ వలనే తెలంగాణాలో 1200 మంది ప్రాణాలు కోల్పోయారని, అందుకు తెలంగాణా ప్రజలకు ఆమె క్షమాపణ చెప్పాలని తెలంగాణా రాష్ట్ర సమితి నాయకుడు, కెసిఆర్ కుమారుడు కె తారక రామారావు అన్నారు. 

ఈ రోజు కరీం నగర్ లో కాంగ్రెస్ పార్టీ అధ్యక్షురాలు సోనియాగాంధీ ఎన్నికల ప్రచారాన్ని ప్రారంభించబోతున్నారు.  తెలంగాణా రాష్ట్రాన్ని ఇచ్చినందుకు తెలంగాణా కాంగ్రెస్ పార్టీ నాయకులు ఆమెకు కృతజ్ఞత సభను ఏర్పాటు చేసారు.  సభాప్రాంగణంలోనే అమరుల కుటుంబ సభ్యులను పరామర్శించే కార్యక్రమాన్ని కూడా రచించారు. 

అందువలన ప్రత్యేకంగా అమరుల ప్రస్తావనను తీసుకునివచ్చిన కెటిఆర్, అందుకు కారణం తెలంగాణా ఇవ్వటంలో కాంగ్రెస్ చేసిన తాత్సారమేనని అన్నారు.  కాంగ్రెస్ పార్టీ అవకాశవాదం, నయవంచనలే నిండు ప్రాణాలను తీసేసాయని కెటిఆర్ అన్నారు. 

తెలంగాణాకు ప్రత్యేక హోదాని ఇప్పించటానికి పొన్నాల ప్రయత్నం చేసి తన చిత్త శుద్ధిని చాటుకోవాలని అన్నారు.  తెలంగాణా ముంపు ప్రాంతాలను సీమాంధ్రలో కలుపుతున్నట్లుగా చేసిన ఆర్డినెన్స్ ని రద్దు చెయ్యాలని కెటిఆర్ డిమాండ్ చేసారు.

-శ్రీజ