శ్రీవారి భక్తులకు తల్లి, పిల్ల కాంగ్రెస్ వల్ల తిప్పలు

Posted: 11/29/2013 10:30 AM IST

అవును.. శ్రీవారి భక్తులు ప్రతిరోజు చాలా ఇబ్బందులు పడుతున్నారు. ఈ విషయాన్ని తెలుగుదేశం పార్టీ సీనియర్ నాయకుడు గాలి ముద్దుకృష్ణమ నాయుడు తెలిపారు. తిరుమల కొండకు వచ్చే శ్రీవారి భక్తులు .. తల్లి, పిల్ల కాంగ్రెస్ తో చాలా ఇబ్బందులు పడుతున్నారని ఆయన గుర్తించారు. తిరుపతి కొండపైన ఎటువంటి రాజకీయ కార్యక్రమాలు నిర్వహించరాదని నిబంధన ఉన్నప్పటికి తల్లి కాంగ్రెస్ నేతలు, పిల్ల కాంగ్రెస్ నాయకులు సమావేశాలు పెట్టి, భక్తులను అపవిత్రం చేస్తున్నారు. రాష్ట్ర ముఖ్యమంత్రి నల్లారి కిరణ్ కుమార్ రెడ్డి తిరుమల కొండపై చేసిన రాజకీయ సమావేశం పై.. గాలి తీవ్రంగా మండిపడుతున్నారు.

 

ముఖ్యమంత్రి హోదాలో ఉండి, ఆయనే నిబంధనలు పాటించకుంటే సామాన్యులు పరిస్థితి ఏమిటని ఆయన ప్రశ్నించారు. ప్రజలు మౌనంగా ఉంటే కొండపైన కాంగ్రెస్‌పార్టీ కార్యాలయాలు కూడా ఏర్పాటు చేసుకొనేందుకు పిల్ల, తల్లి కాంగ్రెస్‌లు వెనుకాడవన్నారు. పైసాపైసా కూడబెట్టి, కాలినడకన తిరుమలచేరే భక్తు లకు అడగడుగునా ఇబ్బందులు ఎదురవుతున్నాయని ఆయన ఆవేదన వ్యక్తం చేశారు. భక్తుల కష్టాలు పట్టించుకోకుండా కొండపై రాజకీయ పెత్తనం చేయటానికి ప్రయత్నించటం సిగ్గుచేటని, తల్లి, పిల్ల కాంగ్రెస్‌ చేష్టలు భగవంతుడికి, భక్తులకు దూరం పెంచేయిలా ఉన్నాయని తెలిపారు.

 

ఆగమ శాస్త్రానికి విరుద్దంగా శ్రీవారి శేష వస్త్రం, తీర్థ ప్రసాదాలను తీసుకువెళ్ళి తిరుపతి విమానాశ్రయంలో సోనియాకు అందచేసి, గతంలో ప్రజల ఆగ్రహానికి కాంగ్రెస్‌ నేతలు గురయ్యారన్నారు. అయినా నేతల తీరులో ఎలాంటి మార్పులేదని ఆయన విమర్శించారు. సీఎం వ్యక్తిగత సహాయకుడితో సహా, ఆయన పేషీలోని అనేకమంది అధికారులు యధేచ్చగా టిక్కెట్లు సిఫారసు చేయటం, టిక్కెట్‌ కొనకుండానే సేవల్లో పాల్గొనటం కాంగ్రెస్‌ పార్టీకి ఆనవాయితీగా మారిందన్నారు. సామాన్య భక్తులకు ఇంటర్నెట్లో అర్చన, అభిషేకం లాంటి టిక్కెట్లు దశాబ్ధాలపాటు దొరకని పరిస్థితిని కాంగ్రెస్‌ నేతలు సృష్టించారని ఆయన మండిపడ్డారు.