మోడీ దేశాన్ని ముందుకు తీసుకెళ్లలేదు

Posted: 10/28/2013 09:08 AM IST

భారతీయ జనతా పార్టీ ప్రధాని అభ్యర్థి, గుజరాత్ ముఖ్యమంత్రి నరేంద్ర మోడీకి ప్రస్తుతం జనాల్లో క్రేజ్ విపరీతంగా ఉంది. యూపీఏ సర్కార్ దిగజారిన పాలన మీదనో, మోడీ దేశాన్ని మార్చేయగడలన్న నమ్మకమో గానీ ఈయన హవా కొనసాగుతుంది. 2014 ఎన్నికల తరువాత మోడీ ప్రధాని అయితే ఆయన ప్రధానిగా సమర్థవంతంగా రాణించలేడని, దేశాన్ని ఆర్థికంగా ముందుకు తీసుకెళ్లలేడని యూఎస్ కి చెందిన ఓ వార్తా పత్రిక వెల్లడించింది.

స్వపక్షాలను, విపక్షాలను సామరస్యంగా ముందుకు తీసుకెళ్ళే లక్షణాలు మోడీలో కనిపించడం లేదని, మోడీకి ఇస్తున్న ప్రాధాన్యతను చూసే బిజెపితో తనకున్న సుదీర్ఘ బంధాన్ని జనతాదల్ యు తెంచేసుకుందని, మోడీ ఎదుగుదల అనేది చాలా మంది భారతీయులను కలవరపెడుతోందని..ముఖ్యంగా 13.8 కోట్ల మంది ముస్లింలను భయపెడుతోందని తెలిపింది. గుజరాత్ ఆర్థిక పరిస్థితి అంత చెప్పుకోదగినదిగా లేదని పేర్కొంది. ఉదాహరణకు ఆ స్టేట్ ముస్లింలు దేశం మొత్తంమ్మీద ఉన్న ముస్లింల కంటే బాగా పేదవారు అయిఉండవచ్చని అభిప్రాయపడింది.

ప్రజల్లో భయాన్ని, వ్యతిరేక భావనలను ప్రోత్సహించడం ద్వారా భారత్ ను ముందుకు నడిపించగలనని ఆయన ఆశపడటం సరికాదని వ్యాఖ్యానించింది. 2002లో గుజరాత్ లో జరిగిన అల్లర్లలో సుమారు వెయ్యిమంది మృతి చెందడాన్ని ఈ సందర్భంగా ఆ పత్రిక ప్రస్తావించింది. మరి ఎన్నికలు దగ్గర పడుతున్నా కొద్ది మోడీ సభల మీద సభలు పెట్టి దూసుకుపోతుంటే.... అగ్ర దేశాలకు చెందిన వార్తా పత్రికలే ఇలాంటి వార్తలను ప్రచురిస్తే ఆయన ఇమేజ్ కి డ్యామేజ్ కలగవచ్చని పలువురు అంటున్నారు. టెక్నాలజీని బాగా వాడుకునే మోడీ దీని పై బహిరంగంగా సమాధానం చెబుతాడో లేక సోషన్ నెట్ వర్కింగ్ సైట్లో అతన అభిప్రాయాన్ని వెల్లడిస్తాడో చూడాలి.