సిఎం X డిప్యూటి సిఎం

Posted: 04/26/2013 07:45 PM IST

రాష్ట్ర కాంగ్రెస్ పార్టీలో వివాదాలు ముదురుతున్నాయి. ఏ రాజకీయ నాయకుడ్ని కదిలించిన రాజకీయ పగతో రగిలిపోతున్నారు. ఎప్పుడు ఏ నాయకుడు మీడియా ముందు మండిపోతారో తెలియాని పరిస్థితి. రాష్ట్ర ముఖ్యమంత్రి నల్లారి కిరణ్ కుమార్ రెడ్డి తీరుపై మొదటి నుంచి ఒక వర్గం గుర్రుగా ఉన్న విషయం తెలిసిందే. అయితే సారీ మాత్రం డిప్యూటి సీఎం దామోదర రాజనర్సింహ వంతు వచ్చింది. ఎస్సీ సబ్ ప్లాన్ విషయంలో ముఖ్యమంత్రి వ్యవహరిస్తున్న తీరుపై ఢిల్లీ నాయకులకు ఫిర్యాదు చెసిన విషయం తెలిసిందే. తాజాగా మరో వివాదం బయట పడింది. సిఎం కిరణ్, డిప్యూటి సిఎం దామోదర రాజనర్సింహా మధ్య వార్ తారాస్థాయికి చేరింది. కొంత కాలంగా తనకు ప్రాధాన్యం తగ్గిస్తున్నారంటూ లోలోపల గుర్రుగా ఉన్న రాజనర్సింహా.. ఈ సారి బయటికి వెళ్లగక్కారు. ఈ నెల 29న మెదక్ జిల్లాలో ఏర్పాటు చేసిన 'ఇందిరమ్మ కలలు' ప్రారంభోత్సవానికి ముఖ్యమంత్రి హాజరవుతున్నారు. ఇందులో పాల్గొనాలన్న సిఎం ఆహ్వానాన్ని డిప్యూటీ సిఎం తిరస్కరించారు. తాను హాజరుకాలేనని తేల్చి చెప్పారు. దీంతో ఇద్దరి మధ్య ఉన్న అంతర్యుద్ధం బయటపడింది. అయితే.. తన సొంత జిల్లాలో జరుగుతున్న అధికారిక కార్యక్రమానికి, అదికూడా ముఖ్యమంత్రి హాజరవుతున్న కార్యక్రమానికి డిప్యూటీ సిఎం దూరంగా ఉండడం వల్ల ఏదోవిధంగా ప్రభావం ఉంటుందని కాంగ్రెస్ వర్గాలు ఆందోళన వ్యక్తం చేస్తున్నారు. ఒక దళిత నాయకుడి పై ముఖ్యమంత్రి వ్యవహరిస్తున్న తీరు పై దళిత సంఘాలు మండిపడుతున్నాయి.