Posted: 05/17/2012 12:03 PM IST

      సీఎం పీఠమే పరమావధిగా పావులు కదిపి బంగపడి సొంత పార్టీ పెట్టిన జగన్ పార్టీ నేతలు ఇప్పడు తీవ్ర ఆందోళనలో కొట్టుమిట్టాడుతున్నారు. కొంతకాలంగా జగన్ ఆస్తులపై సీబీఐ విచారణ జరుగుతున్నప్పటికీ వైఎస్ ఆర్ కాంగ్రెస్ నాయకులు పెద్దగా పట్టించుకోలేదు. అయితే జగన్ వ్యాపారాల్లో పెట్టుబడులు పెట్టిన వ్యాపారవేత్త నిమ్మగడ్డ ప్రసాద్ ను సీబీఐ అరెస్టు చేయడంతో ఆ పార్టీ నాయకుల్లో తీవ్ర ఆందోళన నెలకొంది. నిమ్మగడ్డ అరెస్టుతో జగన్  కంపెనీల్లో పెట్టుబడులు పెట్టిన పెన్నా ప్రతాపరెడ్డి, శ్యాంప్రసాద్ రెడ్డిని కూడా సీబీఐ విచారించే అవకాశం వుందన్న వాదనలు వినిపిస్తున్నాయి. మరోవైపు 28న సీబీఐ ప్రత్యేక న్యాయస్థానం ముందు హాజరు కావాలంటూ జగన్ కు సమన్లు అందాయి. అయితే జగన్  కానీ, ఆయన తరఫు న్యాయవాది కానీ హాజరుకావచ్చని వెసులుబాటు కల్పించడంతో యువనేత హాజరుకాకపోవచ్చని పార్టీ వర్గాలు అంటున్నాయి. ఒకవేళ జగన్ అరెస్టు అయితే పార్టీ భవిష్యత్ ఎలా వుండబోతోందని వైఎస్ ఆర్ కాంగ్రెస్ నేతలు అయోమయంలో పడ్డారు.
     కాంగ్రెస్, టీడీపీల మీద ఓ పక్క మేకపోతు గాంభీర్యాన్ని ప్రదర్శిస్తునే.. ఎరక్కపోయి ఇరుక్కుపోయామా అన్న మీమాంశలో వైఎస్ ఆర్ పార్టీ తీర్థం పుచ్చుకున్న చాలా మంది నేతలు లోలోన మదనపడిపోతున్నారన్నది నిర్వివాదాంశంగా కనిపిస్తోంది. రేపే మాపో పార్టీ పెట్టిన నేతే జైలు ఊచలు లెక్కపెడితే మన పరిస్థితేంటని కొందరు నేతలు తమ అనుయాయుల దగ్గర బాహాటంగానే అంటుండటం గమనార్హం.

...avnk