Posted: 04/30/2012 08:17 PM IST

వైయస్ జగన్ ఆస్తుల కేసులో రెండో నిందితుడు విజయసాయి రెడ్డికి సిబిఐ ప్రత్యేక కోర్టు మరోసారి బెయిల్ మంజూరు చేసింది. ఆయనకు కోర్టు షరతులతో కూడిన బెయిల్‌ను మళ్ళీ మంజూరు చేసింది. గతంలో సిబిఐ కోర్టు ఇచ్చిన బెయిల్‌ను హైకోర్టు రద్దు చేసిన విషయం తెలింసిందే. దాంతో విజయసాయి రెడ్డి లొంగిపోయి మరోసారి సిబిఐ కోర్టులో బెయిల్‌కు పిటిషన్ దాఖలు చేసుకున్నారు.

దీనిపై విచారణ జరిపిన సిబిఐ కోర్టు షరతులతో కూడిన బెయిల్ మంజూరు చేసింది. పాస్‌పోర్టును కోర్టులో సమర్పించాలని, హైదరాబాద్ విడిచి వెళ్లరాదని కోర్టు విజయసాయి రెడ్డిని ఆదేశించింది. అలాగే, సిబిఐ దర్యాప్తునకు సహకరించాలని కూడా ఆదేశించింది. విజయసాయి రెడ్డికి సిబిఐ కోర్టు ఇచ్చిన బెయిల్‌ను మరోసారి హైకోర్టులో సవాల్ చేసేందుకు సిబిఐ సిద్ధపడుతున్నట్లు తెలుస్తోంది.