Posted: 04/30/2012 08:25 PM IST

కృష్ణా జిల్లా తెలుగుదేశం పార్టీ నగర పార్టీ అధ్యక్షుడు వల్లభనేని వంశీ కడప పార్లమెంటు సభ్యుడు వైయస్ జగన్మోహన్ రెడ్డికి చెందిన వైయస్సార్ కాంగ్రెసు పార్టీలో త్వరలో చేరే అవకాశాలు ఉన్నాయని జోరుగా ప్రచారం జరుగుతోంది. మూడు రోజుల క్రితం జగన్‌తో వంశీ విజయవాడలో కలిసిన విషయం రాజకీయవర్గాల్లో తీవ్ర చర్చనీయాంశమైన విషయం తెలిసిందే. ఆయన ఏ క్షణమైనా జగన్ వైపు వెళతారని ప్రచారం జరిగింది.

వంశీ ద్వారా మరో నలుగురు ఎమ్మెల్యేలు వైఎస్‌ఆర్ కాంగ్రెస్ పార్టీలో చేరనున్నారని వార్తలు గుప్పుమంటున్నాయి. ఈ మేరకు జగన్‌తో వంశీ ఆదివారం రాత్రి ఫోన్‌లో మంతనాలు జరిపినట్లు వార్తలు వస్తున్నాయి. ఇప్పటికే వంశీకి టీడీపీ షోకాజ్ నోటీసు జారీ చేసిన విషయం తెలిసిందే. అంతే కాకుండా గుంటూరు, కృష్ణా జిల్లాలలోని పలువురు నేతలు ఉప ఎన్నికల తర్వాత జగన్ పార్టీలో చేరనున్నారని అంటున్నారు.