Posted: 04/17/2012 11:12 AM IST

అమ్మ చేతి వంటకు సాటి లేదు. అందరికీ తెలిసిన విషయమే. అందరూ ఒప్పుకునే విషయమే. అయితే పెళ్లయిన అబ్బాయి దగ్గరికి వెళ్లి 'మీకు మీ అమ్మ చేసిన వంటలంటే ఇష్టమా? మీ భార్య చేతి వంటలంటే ఇష్టమా...?' అని అడిగితే ఏం చెబుతాడు. టక్కున సమాధానం రావడం కష్టమే. ఈ అంశం మీద సర్వే చేయడానికి ఇంగ్లండ్‌లోని ఓ టీవీ చానెల్ వారు మైకు తీసుకుని బయలుదేరారు. రెండు వేలమంది మగవాళ్ల దగ్గరకు వెళ్లి 'మీకు ఎవరి చేతి వంటంటే ఇష్టమని' అడిగారు. అరవైశాతం మంది 'మాకు మా అమ్మ చేతి వంటంటేనే ఇష్టమని' చెప్పారు. ఆ సమాధానంతో ఊరుకోకుండా ఆ ఛానెల్ వారు కెమెరా కాస్త జూమ్ చేసి కారణాలు కూడా అడిగారు. "అమ్మ చేసే వంట సంప్రదాయ బద్ధంగా ఉంటుంది. నా భార్య ఎన్ని కొత్త రకాల వంటలు వండినా నా మనసు మాత్రం అమ్మ వండే వంటలమీదే ఉంటుంది. అమ్మ కొత్త వంటలేమీ వండదు.

అయితే చేసే నాలుగూ చాలా రుచిగా చేస్తుంది'' అని చెప్పారు కొందరు అబ్బాయిలు " మా అమ్మ వండే వంటలకు, నా భార్య చేసే వంటలకు అస్సలు పోలికే ఉండదు. ఒకరి రుచులు ఒకరికి నచ్చవు కూడా. వెరైటీల విషయంలో నా భార్య చాలా ప్రయత్నాలు చేస్తుంది. కాని నాకు మా అమ్మ చేతి వంటే నచ్చుతుంది. అది ఎంత సింపుల్ వంటైనా చాలా టేస్ట్‌గా ఉంటుంది'' అని 47 శాతం మంది మగవారు చెప్పారు. "నేను ఇద్దరి వంటలూ బాగుంటాయనే చెబుతాను. కాని మార్కులు వేయాల్సి వస్తే అమ్మ వంటకే జై కొడతాను. అప్పుడప్పుడు అమ్మ చేతి వంట రుచి గురించి నా భార్యకు చెబుతుంటాను. అమ్మ దగ్గర కొన్ని టిప్స్ తెలుసుకోమని కూడా సలహా ఇస్తుంటాను'' అని 13 శాతం మంది చెప్పారు. "అమ్మ దగ్గర వంట నేర్చుకోమని చెబితే ఇంకేమయినా ఉందా...ఇంట్లో యుద్ధాలు జరిగిపోతాయి. అలాంటి సాహసాలు మేమెప్పుడూ చేయలేదు'' అని అన్నారు మరికొందరు. ఇలా తమ వంట చాయిస్ గురించి చెబుతూ ఇంటి బాధలను కూడా పంచుకున్నారు యుకె అబ్బాయిలు