Posted: 03/26/2012 03:11 PM IST

నోరు మంచిదైతే ఊరు మంచిదవుతుందంటారు. అలాగే మన మాటతీరును, వ్యవహారశైలిని బట్టి ఎదుటివారు మనతో స్నేహం చేస్తారు. మన దగ్గరున్న డబ్బును చూసి కూడా కొంత మంది వాళ్ల అవసరాల కోసం మనకు మిత్రులుగా మెలిగే అవకాశం కూడా ఉంది. ఇది సహజంగా అందరికీ తెలిసిందే. అయితే మనకు ఎంత మంది స్నేహితులుంటారనే విషయాన్ని ఇవేవీ నిర్ణయించవని, మన మెదడు పరిమాణమే నిశ్చయిస్తుందని తాజా అధ్యయనం పేర్కొంటున్నది. మన ఫ్రెండ్స్ సంఖ్యకు, మన మెదడులోని ఆర్బిటల్ ప్రిఫాంటల్ కార్టెక్స్ (ఓపీసీ) అనే ప్రాంతానికి మధ్య సంబంధం ఉందని ఆక్సఫర్డ్ వర్సిటీ ప్రొఫెసర్ రాబిన్ డన్‌బర్ తెలిపారు. ఓపీసీ.. కళ్లకు కొంచెంపైనే ఉంటుంది. స్నేహితుల సంఖ్య ఎక్కువ ఉన్నవారిలో ఈ మెదడు ప్రాంతం పెద్దగా ఉంటుంది.

కాగా మనకు ఎక్కువ మంది మిత్రులుండాలంటే మనం మేథో నైపుణ్యాలను వినియోగించాలని ఈ అధ్యయనం సూచిస్తున్నది. ఈ నైపుణ్యాలనే మెంటలైజింగ్ అని, మైండ్ రీడింగ్ అని కూడా వ్యవహరిస్తారు. ఎదుటివారు ఏం ఆలోచిస్తున్నారో తెలుసుకోగల సామర్థ్యాన్నే మైండ్ రీడింగ్‌గా పేర్కొంటారు. మేథోనైపుణ్యాల సామర్థ్యాన్ని మెదడులోని కొన్ని కీలక ప్రాంతాల పరిమాణం ముఖ్యంగా ఓపీసీ సైజు నిర్ణయిస్తుందని పరిశోధకులు వివరించారు.