Posted: 03/26/2012 03:19 PM IST

మీరు ఊబకాయులా? అయితే.. కొంచెం ఒళ్లు తగ్గించుకునేందుకు ప్రయత్నించండి. ఎందుకంటే ఒంట్లో పేరుకుపోయిన కొవ్వు వయసు మీదపడుతున్నకొద్దీ మెదడుకు చేటు తెస్తుందని శాస్త్రవేత్తలు హెచ్చరించారు. సాధారణ బరువున్నవారితో పోల్చితే ఒళ్లుచేసినవారిలో వృద్ధాప్యంలో మెదడు పనితీరు దెబ్బతింటుందని తెలిపారు. అధ్యయనంలో భాగంగా పరిశోధకులు 60, 70 ఏళ్ల వయసున్న 250 మందికిపైగా స్థూలకాయులకు మేధోపరీక్షలు నిర్వహించారు. అధిక శరీర ద్రవ్యరాశి సూచిక (బీఎంఐ) కలిగినవారికి చాలా తక్కువ మార్కులొచ్చాయి. దీంతో వయోధికుల శరీరంలోని కొవ్వు స్థాయికి, మెదడు పనితీరుకు మధ్య సంబంధాన్ని తెలుసుకునేందుకు పరిశోధకులు.. పరీక్షల్లో పాల్గొన్నవారి ఉదరంలో పేరుకుపోయిన కొవ్వును స్కాన్ చేశారు. మానసిక పరీక్షలు కూడా నిర్వహించారు. ఈ పరీక్షల ఫలితాలను బట్టి.. అధిక బీఎంఐ, కొవ్వు ఉన్నవారు పేలవ ప్రదర్శన కనబరిచినట్లు గుర్తించారు.