Posted: 03/10/2012 11:57 AM IST

దేశ వ్యాప్తంగా సంచలనం రేకెత్తించిన ఓబుళాపురం గనుల లావాదేవీల్లో సరికొత్త విషయాలు వెలుగుచూడసాగాయి. ఈ కేసులో ప్రధాన నిందితుడైన గాలి జనార్దన్‌రెడ్డి అక్రమాలకు సంబంధించి కర్నాటకు చెందిన ఎన్‌ఫోర్స్‌మెంట్‌ డైరక్టరేట్‌ అధికారులు సిబిఐ అధికారుల ను దిల్‌కుషా గెస్ట్‌హౌస్‌లో కలిశారు. రెండు గంటలకు పైగా ఇడి అధికారులు సిబిఐ అధికారులతో భేటీ అయ్యారు. ఈ భేటీలో గాలికి సంబంధించి విదేశీ సంస్థల సహాయం, ఇదే సమయంలో విదేశాల్లో అతను దాచిన డబ్బుల వివరాలను ఇడి అధికారులు సిబిఐకి తెలిపారని తెలుస్తోంది. గాలి ప్రస్తుతం కర్నాటక సిబిఐ కస్టడీలో ఎఎంసి కేసుకు సంబంధించిన విచారణను ఎదుర్కొంటున్న సంగతి తెలిసిందే.

గాలితో పాటు అతని పిఎ అలీఖాన్‌ కూడా సిబిఐ కస్టడీ లోనే వున్నారు. వీరిద్దరినీ నాలుగు రోజులుగా విచారిస్తున్న అక్కడి సిబిఐ అధికారులు కొంత కీలక సమాచారం రాబట్టారని తెలిసింది. ఈ సమాచారాన్ని క్రోఢకీరించుకునేందుకు కర్నాటక నుంచి ఇడి అధికారులు రాష్ట్ర సిబిఐ అధికారులను కలిశారు. గాలి అక్రమ వ్యాపారంలో పలు విదేశీ సంస్థల పాత్ర ఇప్పటికే నిగ్గు తేలగా, పలు విదేశీ బ్యాంకుల్లో గాలికి సంబంధించిన వందల కోట్ల రూపాయల నిధులు మూల్గుతున్నట్లు కూడా కూడా తేలింది.

ఈ నిధులు కర్నాటకలోని ఎఎంసి గనుల అక్రమ తవ్వకాల ద్వారా గాలి సమకూ ర్చుకుని విదేశాల్లో దాచారని అక్కడి ఇడి అధికా రులు నిర్ధారణకు వచ్చారని తెలిసింది. ఇదే విష యాన్ని వారు రాష్ట్ర సిబిఐ అధికారులకు చెప్పారని సమాచారం. ఈ అంశాలకు సంబంధించి కర్నా టక ఇడి అధికారులు ఇదివరకే కేసులు నమోదు చేశారు. మరో నాలుగు రోజుల్లో గాలి కస్టడీ పూర్త వనుండడంతో అతన్ని తిరిగి చంచల్‌గూడ జైలుకు తరలించనున్నారు. కాగా కర్నాటక ఇడి అధికారు లందించిన సమాచారం ఆధారంగా గాలిపై మరికొన్ని కేసులు నమోదు చేసేందుకు ఇక్కడి సిబిఐ అధికారులు సన్నాహాలు చేయసాగారు.