Posted: 01/31/2012 11:04 AM IST

జైలు శాఖ ఉన్నతాధికారికి జైలు పనితీరును ప్రత్యక్షంగా అనుభవించి చూసే అదృష్టం వరించింది. రెండు మూడు రోజుల క్రితం నుంచీ ఊహించిన విధంగానే, ప్రస్తుతం హోం శాఖ కార్యదర్శిగా ఉన్న బిపి ఆచార్య ను ప్రశ్నించటానికి పిలిపించి సిబిఐ నిన్న 4 గంటలు ప్రశ్నించిన తర్వాత అరెస్ట్ చేసామని ప్రకటించింది. కుట్ర, మోసం, విశ్వాసఘాతుకం వంటి అభియోగాల మీద అంతకు ముందు ఏపిఐఐసి మేనేజింగ్ డైరెక్టర్గా వ్యవహరించిన ఆచార్యను ఆ సమయంలో ఆయన ఎమార్ కుంభకోణంలో నిందితులని ఆరోపిస్తూ సిబిఐ అరెస్ట్ చేసింది.

సిబిఐ అరెస్ట్ చేసిన రెండవ ఐఏఎస్ అధికారి బిపి ఆచార్య. మొదట శ్రీలక్ష్మిని ఓబుళాపురం మైనింగ్ అవకతవకల మీద అరెస్ట్ చేస్తే ఇప్పుడు ఎమార్ కుంభకోణంలో బిపి ఆచార్య అరెస్ట్ అయ్యారు. ఉదయం 11.30 కి సిబిఐ తాత్కాలిక కార్యాలయం దిల్ కుషా అతిధి గృహానికి తన అధికారిక వాహనంలో చేరుకున్న బిపి ఆచార్య లోపల విచారణను ఎదుర్కుంటుండగానే బయట ఉన్న ఆయన అధికారిక వాహనాన్ని దాని అవసరమిక లేదని పంపించేసారు. ఎమ్ ఆర్ కేసులో బిపి ఆచార్యను అరెస్ట్ చేసిన విషయాన్ని సిబిఐ జాయింట్ డైరెక్టర్ లక్ష్మీనారాయణ ప్రకటిస్తూ ఈ విషయాన్ని రాష్ట్ర ప్రధాన కార్యదర్శి పంకజ్ ద్వివేదికి ఈ విషయాన్ని తెలియజేసారు.

ఇంతవరకూ అవినీతి ఆరోపణలు ఎదుర్కుంటున్నవారిలో ఏ ఐఏఎస్ ఐపిఎస్ ఆఫీసర్ నైనా అరెస్ట్ చేసారా అని అన్న అన్నా హజారే, ఇక ఆ మాట అనలేని పరిస్థితిని కూడా సిబిఐ తీసుకునివచ్చింది.

-శ్రీజ