Posted: 01/31/2012 10:38 AM IST

భద్రతా సిబ్బంది తీరుతో ఆగ్రహం వహించిన తెదేపా నాయకులు తాము వచ్చిన పని చెయ్యకుండానే వెనుదిరిగి వెళ్ళిపోయిన సంఘటన ఈరోజు ముఖ్యమంత్రి క్యాంప్ ఆఫీసు దగ్గర జరిగింది. ప్రధాన ప్రతిపక్షమైన తెలుగుదేశం పార్టీ నాయకులు జూనియర్ డాక్టర్ల దీక్ష మీద ముఖ్యమంత్రికి వినతి పత్రమివ్వటాని పోతే వారిని భద్రతా సిబ్బంది లోపలికి పోకుండా అడ్డుకుంది. దానితో సీనియర్ నాయకుడు దాడి వీరభద్రరావుతో సహా వెళ్ళిన తెదేపా నాయకులంతా సిబ్బంది అడ్డుకున్న తీరుకి కినుక వహించి వినతి పత్రాన్నివ్వకుండానే వెనుదిరిగిపోయారు.

ముఖ్యమంత్రి ఆదేశాల మేరకే వారు అలా ప్రవర్తించివుంటారని, భద్రతా సిబ్బంది పార్టీలకు అతీతంగా పనిచెయ్యాల్సిన అవసరం ఉందని తెదేపా నాయకులు ఆవేదన వెలిబుచ్చారు. ప్రధాన ప్రతిపక్షంగా తమ దృష్టికి వచ్చిన అవకతవకలను ముఖ్యమంత్రి దృష్టికి తీసుకుని రావటానికి కూడా అనుమతి లేకపోతే ఎలా అంటూ వారు ముఖ్యమంత్రి క్యాంప్ ఆఫీస్ సిబ్బంది పనితీరు పై తమ అసంతృప్తిని వెలిబుచ్చారు.

తమ సమస్యల పరిష్కారం కోసం చేపట్టిన జూనియర్ డాక్టర్ల దీక్ష ఏడవరోజుకి చేరింది. సుగర్ లెవెల్స్ పడిపోయి దీక్ష చేస్తున్నవారి పరిస్థితి ఆందోళనకరంగా ఉండగా ఇద్దరు డాక్టర్ల పరిస్ధితి మరీ విషమించింది. వారిని ఐసియులో చేర్చవలసివచ్చింది. ఇప్పటికీ ప్రభుత్వం తన మొండివైఖరిని వదిలిపెట్టటం లేదని జూనియర్ డాక్టర్లు ఆవేదన చెందుతూ, పరిస్థితి ఇలాగే ఉంటే తమ ఆందోళనను ఇంకా ఉధృతం చేసి ప్రజల్లోకి పోవలసివస్తుందని ప్రభుత్వాన్ని హెచ్చరిస్తున్నారు.

-శ్రీజ