Posted: 01/29/2012 10:57 AM IST

సమవుజ్జీలతో ఆడటమెందుకంటే ఆట మజా రావటానికి. ఓడినా గెలిచినా, సమానంగా పోరాడేవారితో ఆట ఆడినప్పుడు ఆటగాళ్ళకి కలిగే ఆనందం మనం ఎంతైనా చెప్పుకోవచ్చు కానీ నిజానికే దాన్ని అనుభవించిన ఆ ఆటగాళ్ళకే తప్ప మిగతావారికి పూర్తిగా అర్థం కాదు. క్రీడల వలన కలిగే ఆనందం ఎవరి సొంతం కాదు. ఆట ఆడేవాళ్ళే కాకుండా వారితో ఆడించినవారు, వారికి శిక్షణనిచ్చినవారు, వారి బంధుమిత్రులు, వారి మీద ఆశపెట్టుకున్న వారు ప్రాతినిధ్యం వహించే దేశ ప్రజలు, ఆ క్రీడ మీద ఇష్టంతో తిలకించటానికి వచ్చిన ప్రేక్షకులు ఇలా అందరికీ ఆనందం పంచుతుంది క్రీడ. కానీ అది సరిగ్గా జరిగినప్పుడు, ఇరువైపుల వారూ సమానంగా చివరివరకూ పోరాడినప్పుడు.

భారత్ క్రికెట్ జట్టు ఆస్ట్రేలియా గడ్డ మీద ఆస్ట్రేలియాతో ఆడిన టెస్ట్ మ్యాచ్ లో 4-0 తో ఓడిపోవటమే కాదు, ఇన్నింగ్స్ నష్టాలూ వందల్లో పరుగుల నష్టాలతో ఓడిపోవటం భారత్ క్రికెట్ అభిమానులకు పెద్ద నిరాశ ఎలాగూ మిగిల్చింది- ఇక ఆస్ట్రేలియాలో కూడా భారత్ జట్టు ఆడిన ఆట గురించి విమర్శిస్తున్నారు.

భారత్ జట్టు ఆట తలవంపులు తెచ్చే ఆట. పోరాట పటిమ లేనిది అంటూ డైలీ టెలిగ్రాఫ్ విమర్శించటమే కాకుండా పెద్దతలకాయ పోయినప్పుడు చేసే జెండా సగం దించే (హాఫ్ మాస్ట్) కార్యక్రమంతో పెవిలియన్ కి తిరుగుముఖం పట్టిన వారిలా భారత్ జట్టు కారికేచర్ ని కూడా ప్రచురించారు. అదే వ్యాసంలో డైలీ టెలిగ్రాఫే ఆస్ట్రేలియన్ ఆటగాళ్ళను ప్రశంసిస్తూ, చాలా బాగా ఆడారని, ఆస్ట్రేలియా బౌలింగ్ ని రికీ పాంటింగ్ బ్యాటింగ్ నీ విపరీతంగా పొగిడేసారు.

ఈ రెండూ ఎలా సాధ్యమో అర్థం కాదు. భారత్ సరిగ్గా ఆడలేదని అంటూ సరైన పోటీ ఇవ్వలేదని చెప్తూ అదే ఆటలో ఆస్ట్రేలియా చాలా బాగా ఆడిందనటంలో అర్థం లేదు. ఇటు పోటీయే లేనప్పుడు అటు ప్రతిభ చూపించేదేముంటుంది. ఇదే మరి ఎవరైనా కింద పడితే అయినవాళ్లూ కానివాళ్ళూ కూడా ఒక రాయి వేసి పోవటమంటే.

-శ్రీజ