Posted: 01/29/2012 11:18 AM IST

పరమాత్మని కొలవటానికి ముందు పరిశుభ్రంగా ఉండాలని మన పూర్వీకులు ఊరికే చెప్పలేదు. అందుకే పండుగలు, పూజలు, ఇతర శుభకార్యాల్లో పారిశుభ్రానికి ఆగ్రతాంబూలమిస్తారు. శుభకార్యాలను జరిపే ఇళ్ళు, పరిసరాలు, వేసుకునే దుస్తులు, అక్కడ సంచరించే మనుషులు కూడా శుభ్రతను పాటించటమనేది ఆచారంగా తీసుకునివచ్చారు. దేవాలయాల్లో కూడా అందుకే సంప్రోక్షణ చేస్తుంటారు. పూజా విధుల్లో కూడా అంతా శుభ్రం చేసి పూజను ప్రారంభించేముందు కూడా మంత్రాల్లో దేహశుద్ధి, అంతరాళంలోని చిత్తశుద్ధి, భూమి ఆకాశం, నాలుగు దిక్కులు, పంచభూతాలను శుద్ధి చేస్తూ చదివే మంత్రాలతో నీళ్ళు చల్లుతారు.

ఆధునికత పేరుతో పారిశుభ్రానికి, సత్సాంప్రదాయాలకూ నూకలు చెల్లితే ఇక మానవాళి మనుగడ ఎలా ఉంటుందో విఙాన శాస్త్రవేత్తలు చెప్తే కానీ మనకు తెలియదు మరి.  రెండు సంవత్సరాల క్రితం న్యూఢిల్లీ లో సూపర్ బగ్ అని ముద్దుగా పేరు పెట్టుకున్న బాక్టీరియా మెటలో బేటా లాక్టిమసే-1 అనేది కనపడి అందరినీ కలవరపరచింది. ఆ కలవరపాటు నుంచి తేరుకోక ముందే మరో బాక్టీరియా వెలుగులోకి వచ్చింది. అది ఇప్పుడున్న ఏ యాంటీ బయోటిక్ కీ లొంగనిదట. దానికి లా ఎమ్ఆర్ఎస్ఏ అని పేరుపెట్టారు.

భారతదేశంలోని అపరిశుభ్ర వాతావరణంలో సాగించే జనజీవనం వలన జనించి వ్యాపించిందట. ఈ బాక్టీరియా భారతదేశం నా మాతృభూమి అంటూ ఇక్కడే తన సేవలను కొనసాగించకుండా ఇతర దేశాలకూ వలసపోయిందట. మనదేశం నుంచి సప్తసముద్రాలు దాటి ఇంగ్లాండ్, జర్మనీ లకు కూడా పోయిన బాక్టీరియీ ఇంకా ప్రపంచంలో ఎక్కడెక్కడికి పోయిందో ఏం చేస్తుందో అని శాస్త్రవేత్తలు ఆందోళన చెందుతున్నారు. మనకది కనపడదు, దాని గురించి తెలియదు కాబట్టి మనం నిశ్చింతగా మన అపరిశుభ్ర అలవాట్లను తీరా పీక మీదికి వచ్చేంతవరకూ కొనసాగించవచ్చు.

-శ్రీజ