Posted: 01/13/2012 02:56 PM IST

55 సంవత్సరాల క్రితం చేసిన నినాదాన్ని డిఎమ్ కే అధిపతి తమిళనాడు, మాజీ ముఖ్యమంత్రి కరుణానిధి మరోసారి వేదికమీదికి తెచ్చారు. ప్రస్తుతం కేరళ రాష్ట్రంలో ఉన్న దేవికులం, పీర్మేడు తాలూకాలను తమిళనాడులో కలపమని ఆయన డిమాండ్ చేస్తున్నారు. రాష్ట్రాల విభజన సమయంలో జరిగిన అన్యాయాన్ని సరిచేయాలని కోరుతూ 1956 లో డిఎమ్ కె పార్టీ స్థాపకులు అన్నాదురై ఈ దిశగా చేసిన వాదనను కరుణానిధి గుర్తు చేసారు. చారిత్రాత్మకంగా చూసినా భౌగోళికంగా చూసినా కూడా ఈ రెండు ప్రాంతాలూ తమిళులకు, తమిళనాడుకే చెందినవని అన్నారు. కేరళ ప్రభుత్వ విధానమే మరోసారి ఈ డిమాండ్ చేసేట్టుగా చేసిందని కూడా కరుణానిధి అన్నారు.

కేరళ ముఖ్యమంత్రి ఊమెన్ చాందీ మాత్రం ముళ్ళపెరియార్ ఆనకట్ట కొత్తది కట్టాల్సిందేనని పట్టుబడుతున్నారు. సుప్రీం కోర్టు నియమించిన కమిటీ దీని మీద అధ్యయనం చేస్తూనేవుంది కానీ కేరళ ప్రభుత్వం ఒకే మాట మీదనే నిలబడివుంది.

దేవికులం, పీర్మేడు ప్రాంతాలను తమిళనాడులోకి తీసుకోకపోవటమనేది బ్రిటిష్ వారి అవగాహనా లోపం వల్లనే జరిగిందని, 1956 లోను 1957 లోనూ డిఎమ్ కే ఈ దిశగా ఒక నిర్ణయం కూడా తీసుకున్నదని కరుణానిధి అన్నారు. డిఎమ్ కే, తమిళరసు కళగమ్, కమ్యూనిస్ట్ పార్టీ ఆఫ్ ఇండియా, ప్రజా సోషలిస్ట్ పార్టీలు కలిసి ఈ అంశం మీద ఆందోళన చేసి ఒక రోజు బంద్ కూడా పాటించారని ఈ సందర్భంగా కరుణానిది గుర్తు చేసారు.

-శ్రీజ