Posted: 01/12/2012 04:17 PM IST

ఈరోజు ప్రతిష్టాత్మకంగా జరిగిన 18వ ప్రపంచ భాగస్వామ్య సదస్సులో ముఖ్యమంత్రి కిరణ్ కుమార్ రెడ్డి, కేంద్ర వాణిజ్య, పరిశ్రమలు, టెక్సటైల్ శాఖా మంత్రి ఆనంద శర్మ పాల్గొన్నారు. సదస్సు ప్రారంభోపన్యాసంలో ఆనంద్ శర్మ ఆసియా ఆఫ్రికా దేశాలను అమెరికా యూరప్ జపాన్ దేశాలతో పోలుస్తూ, అవన్నీ ఆర్థిక మాంద్యంలో కూరుకునిపోయి ఉన్నాయని, భవిష్యత్తులో ఆసియా ఆఫ్రికా దేశాలే అగ్రరాజ్యాలవుతాయని అన్నారు. రాష్ట్రంలో వనరులను ఇక్కడ పెట్టుబడులు పెట్టటంలో ఉన్న సౌలభ్యాలను వివరించటానికి పవర్ పాయింటే ప్రెజెంటేషన్ ని ఉపయోగించారు.

43 దేశాలనుంచి 1500 మంది ప్రతినిధులు హాజరైన ఈ సదస్సులో 5 లక్షల కోట్ల పెట్టుబడి పెట్టటానికి 233 సంస్థలనుంచి ప్రతిపాదనలు వచ్చాయి. ఈ సదస్సులో మాట్లాడుతూ ఆనంద్ శర్మ, రాష్ట్రంలో పరిశ్రమల కారిడార్ ఏర్పాటు చేస్తామని అన్నారు. అలాగే దేశంలో తూర్పు, దక్షిణ ప్రాంతాల్లో కూడా పరిశ్రమల కారిడార్ కి ప్రభుత్వం ఆలోచన చేస్తున్నదని ఆయన అన్నారు. విదేశాలనుంచి వచ్చిన ప్రతినిధులు కూడా సదస్సులో మాట్లాడి తమ అభిప్రాయాలను తెలియజేసారు.

ఈ సదస్సులో భాగంగా ప్రభుత్వం పలు ఒప్పందాలను చేసుకుంది. అందులో ప్రముఖంగా 33 వేల కోట్ల రూపాయల ఒప్పందాన్ని ప్రభుత్వం జిఎమ్ఆర్ తో కుదుర్చుకుంది. ఆ ఒప్పందాన్ని జిఎమ్ఆర్ అధినేత గ్రంధి మల్లికార్జునరావు, ముఖ్యమంత్రి కిరణ్ కుమార్ మార్చుకున్నారు. 13 వేల కోట్ల రూపాయలతో యశ్ బిర్లాతో ఆయుర్వేదిక్ విలేజ్, పాలి సిలికాన్, క్రీడా విశ్వవిద్యాలయాలకు ఒప్పందం కుదిరింది. 5 వేల కోట్ల రూపాయలతో ఎల్ఎన్ జి టెర్మినల్ ఏర్పాటు కోసం కూడా ఒప్పందం చేసుకోవటం జరిగింది.

-శ్రీజ