Posted: 01/12/2012 03:47 PM IST

ఈరోజు అరకులో శాసనసభ్యుల పర్యటన ముగిసిన సందర్భంగా మాట్లాడుతూ చిరంజీవి రాష్ట్రంలో నెలకొన్న రాజకీయ పరిస్థితిమీద తన ఆవేదనను వ్యక్తపరచారు. ప్రజలకు సేవ చేయాలనే దృక్పథంతోనే రాజకీయాల్లోకి వచ్చానని, లోపం ఎక్కడుందో తెలియటం లేదు కానీ చిన్నచిన్న సమస్యలు కూడా పరిష్కరించటంలో జాప్యం జరుగుతోందని చెప్తూ తను ఎవరినీ తప్పు పట్టటం లేదని, కేవలం ఉన్న పరిస్థితులనే చెప్తున్నానన్నారు.

ఒక ఉదంతాన్ని వివరిస్తూ, శ్రీకాకుళం జిల్లలో పర్యటిస్తున్న సందర్భంగా ఒక ప్రభుత్వ వసతి గృహంలోని బాలికలతో మాట్లాడుతున్నప్పుడు వారి సమస్యలలో ఒకటైన మరుగుదొడ్లు లేకపోవటం తనని చాలా బాధించిందని చిరంజీవి చెప్పారు. 8 నుంచి 10 వ తరగతి చదువుకునే బాలికలకు మరుగుదొడ్డి లేకపోవటమా. అదే చోట నా కూతురుంటే అని ఆలోచిస్తే చాలా బాధనిపించింది. ప్రభుత్వంతో ఇది జరిగే పని కాదని నా సొంత డబ్బులే 3 లక్షలు ఖర్చు పెట్టి అక్కడ మరుగుదొడ్లు కట్టించానని అన్నారు.

అలాగే తన సొంత నియోజకవర్గంలోని హాస్పిటల్ లో మత్తు మందిచ్చే డాక్టర్ (ఎనస్తీసిస్ట్) లేక పోవటంతో గర్భిణీ స్త్రీలకు బాలింతలకు కలుగుతున్న ఇబ్బందులు చూసి, మాజీ ఆరోగ్య మంత్రి దానం నాగేందర్ దగ్గర్నుంచి ప్రస్తుత ఆరోగ్య మంత్రి డిఎల్ రవీంద్రా రెడ్డి వరకూ, ఆరోగ్య శాఖ కార్యదర్శి, ముఖ్య కార్యదర్శి ఇంతమందిని దర్శించుకున్నా ఒక డాక్టర్ ని నియమించలేకపోయారు. కారణాలు ఏవేవో చెప్తారు, ఇదిగో అదిగో అంటారు కానీ పని మాత్రం జరగలేదు. అందువలన ప్రభుత్వ విధానంలో మార్పు వస్తేనే తప్ప అతి చిన్న సమస్యలు కూడా ఇలాగే పరిష్కారం దొరక్క మిగిలిపోతాయని చిరంజీవి భావోద్వేగంతో అన్నారు.

-శ్రీజ