Posted: 01/09/2012 10:49 AM IST

తెలంగాణా వాదులలో ముఖ్యంగా తెరాస భయపడ్డంతా జరిగింది. ఇన్నాళ్ళూ ఏకఛత్రాధిపత్యం వహించిన తెరాస, ఇతర పార్టీ నాయకులను రానివ్వకపోవటానికి కారణం ఏదైతే ఉందో ఈ రోజు అదే జరిగింది. నిజమాబాద్ జిల్లా, మాచారెడ్డి మండలం, ఇసాయిపేటలో తెరాస నేతలు కెటిఆర్, గంప గోవర్దన్ కు వింత అనుభవం ఎదురైంది. ఆ గ్రామంలో పార్టీ జెండా ఎగురవేసి సభలో మాట్లాడుతుంటే, మీరేం చేసారని ఓట్లడగటానికి మళ్ళీవచ్చారంటూ వాళ్ళిద్దరినీ మహిళలు నిలదీసారు. సెంటిమెంట్ ని స్పర్శిస్తూ, తెలంగాణా కావలసినవాళ్ళెవరోచేతులెత్తండి అని అన్నా ఎవరూ చెతులెత్తకపోయేసరికి కెటిఆర్ వేదిక దిగివచ్చి వారితో స్వయంగా మాట్లాడటానికి వెళ్ళగా, గంప గోవర్ధన్ తమ గ్రామానికి ఎన్నిసార్లు వచ్చాడో చెప్పమని వాళ్ళు తీవ్ర స్వరంలో ప్రశ్నించారు.

గ్రామంలో ఉన్న ఇబ్బందులన్నిటినీ ఏకరవు పెట్టారు అక్కడి గ్రామవాసులు. తాగనికి నీళ్ళు లెవ్వు, పంటలు ఎండిపోతావున్నై, రైతులకు రుణాలు లెవ్వు, దాంతో వాళ్ళంతా అప్పులు కూరుకుపోతున్నరు, పధకాలన్నరు పావలా వడ్డీలు, టివిలిస్తమన్నరు, దీపం కనెక్షలెయ్యి, కనీసం దుబాయ్ బాధితులు ఆత్మహత్యలు చేసుకుంటే మందలించటానికైన వచ్చింరా అంటూ నిలదీసారు. అదే మండలం ఎల్లంపేటలో కూడా అలాంటి సన్నివేశమే ఎదురైంది. అయితే అన్నిటికీ ఒకటే మందు, తెలంగాణ వస్తే అన్నీ సర్దుకుంటయని నాయకులు నచ్చచెప్పచూసారు. కానీ గంప గోవర్దన్ కి తెలంగాణ ఇప్పుడె యాదికొచ్చిందా అంటూ అతనికి ఒట్లెయ్యమని వాళ్ళంతా తేల్చి చెప్పేసారు.

-శ్రీజ