చిన్నమ్మకు సమైక్య సెగ.. వైద్యం బంద్

Posted: 10/18/2013 04:11 PM IST

కేంద్రమంత్రి పురందేశ్వరికి సమైక్య సెగ తగిలింది.ఈరోజు ఉదయం విశాఖపట్నం విమానాశ్రయంలో పురందేశ్వరిని విద్యార్థులు అడ్డుకున్నారు. సమైక్యాంధ్రకు మద్దతుగా మంత్రి పదవికి రాజీనామా చేయాలని వారు డిమాండ్ చేశారు. పరిస్థితి ఉద్రిక్తంగా మారటంతో విద్యార్థులను పోలీసులు అరెస్ట్ చేశారు. మరోవైపు రాష్ట్ర విభజన ఆగే పరిస్థితి లేనందున జీవోఎంకు రూట్‌మ్యాప్ ఇద్దామంటూ కేంద్ర మంత్రి పురందేశ్వరి ప్రతిపాదనకు పారిశ్రామికవేత్తల నుంచి తీవ్ర ప్రతిఘటన వ్యక్తమైంది. ఓ ప్రైవేటు కార్యక్రమంలో పాల్గొనేందుకు విజయవాడ వచ్చిన దగ్గుబాటి వెంకటేశ్వరరావు, పురందేశ్వరి దంపతులు నగరంలోని కొందరు పారిశ్రామికవేత్తలతో సమావేశమై సమైక్య ఉద్యమంపై చర్చించినట్లు తెలిసింది.

 

సీమాంధ్ర ప్రాంతం చాలా నష్టపోయిందని, ఈ ప్రాంతం అభివృద్ధి చెందాలంటే ఏం కావాలనే విషయాన్ని విభజనపై నియమించిన కేంద్రమంత్రుల బృందానికి వివరిద్దామని సమావేశంలో పురందేశ్వరి ప్రస్తావించగా, అందుకు పారిశ్రామికవే త్తలు అభ్యంతరం వ్యక్తంచేసినట్లు తెలిసింది. తామంతా సమైక్యవాదానికి కట్టుబడి ఉద్యమం చేస్తుంటే విభజనను అంగీకరిస్తూ రూట్‌మ్యాప్ ఎలా ఇస్తామని పారిశ్రామికవేత్తలు నిలదీసినట్లు తెలిసింది.

 

వైద్యం బంద్

సమైక్యాంద్ర ఉద్యమ నేపథ్యంలో ప్రభుత్వ వైద్యుల సంఘం పిలుపు మేరకు ఓపీ విభాగాలు మూతపడ్డాయి. ఉత్తరాంద్ర జిల్లా ఆరోగ్య ప్రధాయినిగా గుర్తింపు పొందిన కేజీహెచ్ తో సహా నగరంలో ఉన్న ఆర్.ఇ. హెచ్, టి.బి, ఐ.డి.హెచ్ , మెంటల్ కేర్ , వీజీహెచ్, ఈఎన్జీ ఆసుపత్రుల్లో ఓపీ విభాగాలు పని చేయలేదు. ప్రభుత్వ వైద్యుల సంఘం కేంద్ర కమిటి నిర్ణయం మేరకు రాష్ట్ర వ్యాప్తంగా ఉన్న అన్ని ప్రభుత్వ ఆసుపత్రుల్లో ఓపీ సేవలను నిలిపివేశారు. ఈనెల 26 వరకు ఉద్యమ కార్యాచరణను ప్రకటించారు. దసరా పండగ నేపధ్యంలో నాలుగు రోజుల పాటు ఓపీలను తెరిచిన వైద్యులు మళ్లీ నిలిపివేయడంతో రోగుల అవస్థలు మొదలయ్యాయి.