Posted: 02/27/2013 07:59 PM IST

నగరం నడిబొడ్డులో రూ.25 కోట్లు విలువచేసే దాదాపు మూడెకరాల జీవీఎంసీ స్థలం కబ్జా కోరల్లో చిక్కుకుంది. ప్రభుత్వ అనుమతి లేకుండా నేతల అండతో శాశ్వత నిర్మాణాలు చేపడుతున్నారు. కొన్ని నిర్మాణాలు ఇప్పటికే అమ్మేశారు. అయినా అధికారులు చోద్యం చూస్తున్నారు. పైగా జీవీఎంసీ కౌన్సిల్ తీర్మానం ఉందంటూ తప్పించుకుంటున్నారు. కౌన్సిల్ తీర్మానం మేరకు తాత్కాలిక వసతి షెడ్లు నిర్మించాల్సిన అధికారులు నేతల ఒత్తిళ్లకు తలొగ్గి అన్యాక్రాంతం చేస్తుండడం అనుమానాలకు తావిస్తోంది. పూర్ణామార్కెట్ ఆధునీకరణ ప్రతిపాదనలతో దాన్ని అనుకుని దుర్గాలమ్మగుడి రోడ్డులో ఉన్న పండ్ల దుకాణాలను తొలగించాలని నిర్ణయించారు. ప్రత్యామ్నాయంగా పాతబస్టాండ్ స్థలంలో తాత్కాలిక షెడ్లు నిర్మించాలని రెండేళ్ల క్రితం కౌన్సిల్ తీర్మానించింది. పండ్ల వర్తక సంఘాల నుంచి దరఖాస్తులు స్వీకరించగా 33 మంది ఆసక్తి చూపారు. పూర్ణామార్కెట్ ఆధునీకరణ పేరుతో తమను పై అంతస్తులకు పంపి గ్రౌండ్‌ఫ్లోర్‌లోని షాపుల్ని స్థానిక నేతలు దక్కించుకునే యోచనలో ఉన్నారన్న సమాచారంతో అనంతరం వీరు వెనుకంజవేశారు. వీరి సమ్మతితో సంబంధం లేకుండా అప్పటి పాలక మండలి పాతబస్టాండ్ స్థలాన్ని రూ.లక్షలు వెచ్చించి చదునుచేసింది. ఈ స్థలంలో ఒక్కో షెడ్డుకు రూ.లక్ష ఖర్చుచేసి 50 షెడ్లను నిర్మించారు. ఏడాదిన్నరగా ఇవి ఖాళీగానే ఉన్నాయి. కొందరు వీటిని అమ్ముకున్నారు. తాజాగా ఈ షెడ్లను కూల్చేసి జీవీఎంసీతో సంబంధం లేకుండా కొందరు శాశ్వత నిర్మాణాలు చేపడుతుండడం గమనార్హం.