Posted: 02/27/2013 07:55 PM IST

కేంద్ర రైల్వే మంత్రి బన్సాల్ మంగళవారం ప్రకటించిన రైల్వే బడ్జెట్ విశాఖ వాసులకు కొంత ఖేదాన్ని మోదాన్ని మిగిల్చింది. బడ్జెట్‌లో ముందుగా ఊహించినట్టే రైల్వే జోన్ ప్రస్తావన లేదు. కనీసం దక్షిణ మధ్య రైల్వేలో విలీనం చేస్తామన్న మాట కూడా లేకపోవడం వాల్తేర్ జోన్ ప్రియులను ఆవేదనకు గురి చేసింది. విశాఖలోనే కోచ్ రిపేర్ వర్క్‌షాప్ వస్తుందని ఢంకా మోగించినా ఆఖరి క్షణంలో ఒడిశాలోని కలహండికి ఇది తరలిపోవడం విశాఖ వాసులను ఉసూరుమనిపించింది. రైల్వే ప్రాజెక్టులు, కొత్త రైల్వే లైన్‌లు వంటి ప్రతిపాదనలు లేకపోయినా గుడ్డిలో మెల్ల అన్నట్టుగా విశాఖ నుంచి మూడు కొత్త రైళ్లు ప్రకటించారు. మరో రెండు రైళ్ల ఫ్రీక్వెన్సీని పొడిగించారు. విశాఖ మీదుగా మరో మూడు రైళ్లను ప్రతిపాదించారు. దువ్వాడ మీదుగా మరో రైలు మంజూరైంది. విశాఖ స్టేషన్‌లో ఎగ్జిక్యూటివ్ లాంజ్‌ను నిర్మించేందుకు మంజూరు చేశారు. విశాఖపట్నం రైల్వేస్టేషన్లో అధునాతన వసతుల బస ఏర్పాటుకానుంది.

ఎగ్జిక్యూటివ్ లాంజ్‌గా వ్యవహరించే దీనిని విశాఖకు మంజూరు చేస్తున్నట్టు మంగళవారం రైల్వే మంత్రి బన్సాల్ బడ్జెట్లో ప్రకటించారు. ఈ వసతి ఉన్నత శ్రేణి ప్రయాణికులకు ఎక్కువగా అందుబాటులోకి వస్తుంది. ప్రతిపాదిత ఎగ్జిక్యూటివ్ లాంజ్‌లో అడుగుపెట్టాలంటే రూ.300 చెల్లించాలి. మూడు గంటలపాటు ఉండొచ్చు. అదనంగా ప్రతిగంటకు రూ.125 చెల్లించాలి. విశాలంగా ఉండే నిరీక్షణ హాలులో ఉన్నత శ్రేణి ప్రమాణాలతో కూడిన ఫర్నిచరుంటుంది. నెట్‌సదుపాయం కోసం వెంపర్లాడనవసరం లేదు. వైఫై సౌకర్యం కూడా కల్పిస్తారు. హాయిగా కూర్చుని లేదా పడుకుని చదువుకునేందుకు వీలుగా దినపత్రికలు..మ్యాగజైన్లు కూడా సరఫరా చేస్తారు. టీవీలుంటాయి. విశాఖ నుంచి మూడు కొత్త రైళ్లు పట్టాలెక్కబోతున్నాయి. ఈ బడ్జెట్లో ఊహించినట్టుగానే ఈ మూడు కొత్త రైళ్లు వచ్చాయి. విశాఖ నుంచి గాంధీధాం(గుజ రాత్) రైలు, విశాఖ నుంచి జోధ్‌పూర్(రాజస్తాన్) ఎక్స్‌ప్రెస్‌ను ముందుగా అనుకున్నట్టుగా ప్రకటించారు. విశాఖ-కొల్లాం(కేరళ) రైలుపై పెద్ద గా ఆశలు పెట్టుకోకపోయినా అనుకోని అతిథిలా వచ్చింది.