కొనసాగుతున్న బంద్

Posted: 07/31/2013 11:52 AM IST

సిడబ్ల్యూసి నిర్ణయంపై తెలంగాణలో హర్షాతిరేకాలు వ్యక్తమవుతుండగా... సీమాంధ్రలో పెద్ద ఎత్తున నిరసన వ్యక్తమవుతున్నాయి. కాంగ్రెసు పార్టీ ప్రకటనతో సీమాంధ్ర రగులుతోంది. విశాఖ, తిరుపతి, విజయవాడ, శ్రీకాకుళం, కర్నూలు తదితర ప్రాంతాల్లో సమైక్యాంధ్ర ఐక్యకార్యాచరణ సమితి రాస్తారోకోలో నిర్వహిస్తోంది. వ్యాపారస్తులు స్వచ్చంధంగా దుకాణాలు బంద్ చేశారు. విద్యాసంస్థలు బంద్ పెట్టారు. విద్యార్థులు, సమైక్యవాదులు పెద్ద ఎత్తున రోడ్డెక్కారు.

 

కాంగ్రెసు పార్టీ ప్రకటన రాగానే సీమాంధ్రలో పెద్ద ఎత్తున నిరసన జ్వాలలు ఎగిశాయి. విభజనను అడ్డుకోలేని నేతలను చేతకాని వారిగా పరిగణించి 18 ఏళ్లు వెలివేస్తున్నట్లు ప్రకటించారు. పలుచోట్ల కాంగ్రెస్ పార్టీ అధినేత్రి సోనియా గాంధీ, యూపిఏ దిష్టి బొమ్మలను దగ్ధం చేశారు. శ్రీ పొట్టి శ్రీరాములు విగ్రహానికి క్షీరాభిషేకం చేస్తూ ఐకాస నేతలు తమ నిరసన తెలిపారు. సమైక్యాంధ్ర ఐక్యకార్యాచరణ సమితి సీమాంధ్ర బంద్‌కు పిలుపునివ్వడంతో పెద్ద ఎత్తున పోలీసు బలగాలను మోహరించారు. పలువురిని ముందస్తుగా అరెస్టు చేశారు. కాగా బంద్ నేపథ్యంలో సామాన్య ప్రజలు ఇబ్బందులు ఎదుర్కొంటున్నారు.

విశాఖపట్నం : కంచరపాలెం దగ్గర జాతీయరహదారిపై సమైక్యాంధ్ర విద్యార్థి జేఏసీ ఆందోళనకు దిగింది. దీంతో అక్కడ ట్రాఫిక్ తీవ్ర అంతరాయం ఏర్పడింది.

రాష్ట్ర విభజనకు వ్యతిరేకంగా ఏయూ విద్యార్థులు ఆమరణ దీక్షకు దిగారు. వీరికి వీసీ సంఘీభావం తెలిపారు.

జగదాంబ సెంటర్ వద కాంగ్రెస్ పార్టీ ఆందోళనకు దిగింది. కాంగ్రెస్ కార్యకర్తలు షాపులను మూసివేయిస్తున్నారు. అక్కడ నిర్వహించిన మానవహారంలో పలువురు ఎమ్మెల్యేలు పాల్గొన్నారు.

రాష్ట్ర విభజనను వ్యతిరేకిస్తూ ఎన్టీపీఎస్‌లో ఉద్యోగులు విధులు బహిష్కరించారు.

జిల్లాలో పలు పాఠశాలలకు యాజమాన్యాలు సెలవులు ప్రకటించారు.

కర్నూలు : సమైక్యాంధ్రకు మద్దతుగా జిల్లాలో బంద్ కొనసాగుతోంది. జిల్లా వ్యాప్తంగా బస్సులు నిలిచిపోయాయి. విద్యాసంస్థలు, వ్యాపార సంస్థలు మూతపడ్డాయి. పలు పాఠశాలలకు మూడు రోజుల పాటు సెలవులు. ఎలాంటి అవాంఛనీయ సంఘటనలు జరుగకుండా నగరంలో భారీగా పోలీసు బలగాలు మోహరించారు.

కృష్ణా : రాష్ట్ర విభజనను వ్యతిరేకిస్తూ బస్టాండ్ వద్ద విద్యార్థి జేఏసీ ధర్నా నిర్వహించడంతో పోలీసులు వారిని అడ్డుకుని అరెస్ట్ చేశారు.

బెంజి సర్కిల్ వద్ద దేవినేని అవినాష్ ఆధ్వర్యంలో ధర్నా చేపట్టారు.

మూడు రోజుల పాటు విధులు బహిష్కరించాలని బెజవాడ బార్ అసోసియేషన్ నిర్ణయించింది.

అనంతపురం : ధర్మవరంలో ఉద్రిక్తత నెలకొంది. రాష్ట్ర విభజనను నిరసిస్తూ బస్సులు, ఆటోలపై ఆందోళనకారులు దాడికి పాల్పడ్డారు. ఎలాంటి ఘటనలు జరుగకుండా భారీగా పోలీసు బలగాల మోహరించారు.