Posted: 03/15/2013 05:38 PM IST

నగర బీజేపీలో ఎవరికి వారే యమునాతీరే అన్నచందంగా ఉంది. ఇటీవల నగర అధ్యక్ష పదవికి జరిగిన పోటీలో దాసం ఉమామహేశ్వరరాజు, అడ్డూరి శ్రీరామ్‌లు పోటీపడగా, మూడు ఓట్ల తేడాతో శ్రీరామ్ ఓటమి పాలయ్యారు. దీంతో బీజేపీలో రెండు శిబిరాలు ఏర్పడినట్లు చెబుతున్నారు. బీజేపీ కార్యాలయం నుంచి దాసం ఉమామహేశ్వరరాజు నిర్వహిస్తున్న కార్యక్రమాలకు కొంతమందికి సమాచారం ఇవ్వడం లేదని చెబుతున్నారు.  సమాచారం లోపం వల్ల బీజేపీ అధ్యక్షుడి ఆధ్వర్యంలో జరిగే కార్యక్రమాలకు కేవలం వేళ్లపై లెక్కించగలిగిన మంది మాత్రమే హాజరవుతున్నారన్న విమర్శలు ఉన్నాయి. ఇందుకు ప్రతిగా అడ్డూరి శ్రీరామ్, పట్నాయక్‌లు వేరొక శిబిరంగా ఏర్పడి వారే కార్యక్రమాలను నిర్వహిస్తున్నారు. డివిజన్ స్థాయిలో నాయకులు ఉన్నా, వారు కార్యక్రమాలు నిర్వహించే సత్తా ఉన్న వారు కాదని స్పష్టం చేస్తున్నారు. కాగా నగర కమిటీ కూడా ఇంత వరకు ఏర్పడలేదు. ఈ క్రమంలో నగరానికి రాష్ట్ర నాయకుడు ఒకరు పరిశీలకులుగా వస్తున్నారు. ముఖ్యంగా పార్టీలో ఒంటెత్తు పోకడలపై ఆయన దృష్టిసారించాలని, లేకపోతే పార్టీ ప్రతిష్ఠ దెబ్బతింటుందని అంటున్నారు.