Posted: 03/15/2013 05:26 PM IST

వీకెండ్స్‌లో నాన్ వెజ్ లాగించేద్దామనుకునే భోజన ప్రియులూ జాగ్రత్తగా ఉండండి. మీరు కొనుగోలు చేసే చికెన్ తాజాది అవునో కాదో చూసి మరీ కొనుగోలు చేయండి. ఎందుకంటే జబ్బు పడి మృత్యువాత పడిన కోళ్ళ మాంసం కూడా చాటు మాటున మార్కెట్లోకి వస్తోంది. ప్రజారోగ్యశాఖ తమనేమీ చేయలేదన్న ధైర్యమో ఏమో చచ్చిన కోళ్ళను కూడా డ్రెసింగ్ చేయించి మాంసం విక్రయించటానికి సిద్ధపడుతున్నారు కొంతమంది ఘనులు. నగరంలో జబ్బు పడి చనిపోయిన కోళ్ళ మాంసాన్ని విక్రయించే ముఠా తయారైంది. అక్రమార్జన పరులు కొందరు పౌల్ట్రీ ఫారాలలో జబ్బుల బారిన పడి చనిపోయిన కోళ్ళను నగరానికి తీసుకు వచ్చి డ్రెస్సింగ్ చేయించి, సొమ్ము చేసుకుంటున్నాయి. ఇలాంటి ముఠాలకు నగరంలోని పలు మాంసం విక్రయ కేంద్రాలు వేదికలుగా మారాయి. భారీ ఎత్తున కోళ్ళను డ్రెస్సింగ్ చేయాలంటే చిన్నపాటి దుకాణాలు పనికిరావు. అందుకే కార్పొరేషన్‌కు సంబంధించిన మాంసం, చేపల మార్కెట్లను ఈ ముఠా ఎంచుకుంటోంది.

అలాంటి వాటిలో చిట్టినగర్ గుజ్జారి ఎల్లారావు (వీరాంజనేయ) నగరపాలక సంస్థ మార్కెట్ కూడా ఒకటి. ఈ మార్కెట్‌లో అన్ని రకాల మాంసం, సముద్ర జంతువుల మాంసాలు విక్రయిస్తారు. మాంసం దుకాణాల తనిఖీల పర్యవేక్షణ అధికారాలన్నీ కార్పొరేషన్ చేతుల్లో నుంచి జిల్లా ఫుడ్ తనిఖీ అధికారుల చేతుల్లోకి వెళ్లిన నాటి నుంచి ఈ మార్కెట్‌లో జబ్బుల బారిన పడి చనిపోయిన కోళ్ళు, జంతువుల మాంసాన్ని డ్రెస్సింగ్ చేస్తున్నారని, వాటినే విక్రయిస్తున్నారన్న ఆరోపణలు వస్తున్నాయి. ఈ ఆరోపణలను నిజం చేస్తూ, జబ్బు పడి చనిపోయిన కోళ్ళను డ్రెస్సింగ్ చేయించటానికి వచ్చిన ముఠా ఒకటి స్థానికులకు పట్టుబడింది. ట్రక్కు ఆటోలో వందలాది కోళ్ళను మార్కెట్ తీసుకు వస్తుండగా స్థానికులు గమనించారు. అప్పటికే కోళ్ళు చనిపోయి ఉండటంతో అనుమానం వచ్చి మీడియా దృష్టికి తీసుకు వచ్చారు.