హిందూ సంప్రదాయంలో గొబ్బెమ్మల ప్రాముఖ్యత

Posted: 03/27/2014 06:31 PM IST

హిందూ సంస్కృతీ, సంప్రదాయాల ప్రకారం గొబ్బెమ్మలకు ఒక ప్రత్యేక స్థానం వుంది. గొబ్బెమ్మలను సంస్కృతి, సరదాల మేళవింపుగా పరగణిస్తారు. ముఖ్యంగా ధనుర్మాసం ప్రారంభమైన రోజు నుండి ప్రతిఒక్కరు వీటిని ప్రత్యేకంగా పూజాకార్యక్రమాలలోను, ఇతర కార్యాలలో ఉపయోగిస్తారు. 

ధనుర్మాసం రోజు నుండి తమ ఇంటిముందు వాకిళ్లలో రంగురంగుల ముగ్గులు తీర్చిదిద్ది.. వాటిమధ్యలో గొబ్బెమ్మలను వుంచడం ప్రాచీనకాలం నుండి వస్తున్న ఆచారం. మొదటగా.. గొబ్బెమ్మలకు పసుపు, కుంకుమలు పెట్టి, వాటిమధ్యలో పుష్పాలతో అలంకరిస్తారు. అలా అలంకరించిన తరువాత మహిళలు ఆ రంగవల్లికలు చుట్టూ చప్పట్లు కొడుతూ, ఆడిపాడుతారు. 

మరికొంతమంది తమదైన పద్ధతిలో వీటిని సాయంత్రంవేళ పెరట్లో దీపాలు వెలిగించి, గొబ్బెమ్మలు తయారుచేసుకుని, సందె ముగ్గుల మధ్య వుంచుతారు. అందుకే వీటిని సందె గొబ్బెమ్మలు అని అంటారు. 

ఇలా ఈ విధంగా ధనుర్మాసం నెలమొత్తం స్త్రీలు గొబ్బెమ్మలను తయారుచేసుకుని, తమ ఇంటిముందు అలంకరించుకున్న రంగవల్లికల మధ్య వీటిని పెట్టి.. వినోదంగా తమ రోజులను గడుపుతారు. పిల్లలు కూడా ఈ వినోదంలో పాలుపంచుకుంటారు. సరదాగా తమ జీవన విధానాన్ని సాగిస్తారు. 

ధనుర్మాసంలో ఇంటిముందు వుంచిన గొబ్బమ్మలను బాగా ఎండబెడతారు. కనుమరోజు వీటిని పొయ్యికొంద పెట్టి కాల్చి.. ఆ మంటలతోనే పాయాసాన్ని తయారుచేస్తారు. ఆ పాయాసాన్ని దేవుడికి నైవేద్యంగా పెట్టడం కూడా ఆచారం. మొత్తంమీద గొబ్బెమ్మలు కూడా హిందూ సంప్రదాయాలలో ఒక ప్రధానపాత్రను పోషిస్తాయి.