గాంధీ పుట్టినరోజు - నిరాశలో ఖైదీలు

Posted: 10/02/2013 10:57 AM IST

మోహన్ దాస్ కరంచంద్ గాంధీ... బ్రిటీష్ సామ్రాజ్యాన్ని.. ప్రజాస్వామ్యం ముందు మోకరిల్లేలా చేశారు. నెత్తుటి చుక్క చిందకుండా.. ప్రజల ఆకాంక్షలను ఎలా నెరవేర్చుకోవచ్చో ప్రపంచానికి చాటి చెప్పారు. అహింసే ఆయుధంగా దేశానికి స్వాతంత్ర్యం తెచ్చిపెట్టిన గాంధీ జయంతి ఈరోజు. గాంధీజీ 1869 అక్టోబరు 2న గుజరాత్ లోని పోరుబందర్ లో జన్మించారు. ఈయన అసలు పేరు మోహన్ దాస్ కరంచంద్ గాంధీ. ఉన్నత విద్య కోసం దక్షణాఫ్రికా వెళ్లిన ఆయన..అక్కడ నల్లజాతీయులపై తెల్లవారు చూపుతున్న వివక్షను ప్రశ్నించారు. దక్షిణాఫ్రికాలో అనేక శాంతి ఉద్యమాలు నడిపిన బాపూ మనదేశం చేరకుని ప్రజల కోసం పోరాటం ప్రారంభించారు. సహాయనిరాకరణ, ఉప్పు సత్యాగ్రహం, క్విట్ ఇండియా లాంటి మహా ఉద్యమాలు చేశారు. చివరకు జనవరి 30, 1948లో గాడ్సే తుపాకీ తూటాలకు బలయ్యారు.

 

నిరాశే..

కొన్నేళ్లుగా జైలులో శిక్ష అనుభవిస్తున్న ఖైదీలకు ఈ సారీ నిరాశే ఎదురుకానుంది. గాంధీ జయంతి సందర్భంగా నేడు ఖైదీల విడుదల లేదని తెలుస్తోంది. రాష్ట్ర వ్యాప్తంగా పలు జైళ్లలో శిక్ష అనుభవిస్తున్న వారి విడుదల కోసం ప్రభుత్వం ఐదు రోజుల క్రితం జీవో జారీ చేసింది. అయితే ఈ ఏడాది నుండి అమల్లోకి వచ్చిన కొత్త మార్గదర్శకాల ప్రకారం..అర్హులైన ఖైదీల జాబితా రూపకల్పనకు మరింత సమయం అవసరమని, ఈ జాబితాను ఈనెల 26 నాటికి ప్రభుత్వానికి అందజేస్తామని జైళ్ల శాఖ ఐజి సునీల్ కుమార్ తెలిపారు. ఈ జాబితా పరిశీలించిన తర్వాతే ఖైదీల విడుదలపై ప్రభుత్వం నిర్ణయం తీసుకుంటుంది. ఇప్పటికే వరుసగా ఏడుసార్లు ప్రభుత్వం ఖైదీలకు క్షమాబిక్ష పెట్టలేదు.