Posted: 12/12/2012 06:03 PM IST

       నాలుగు శతాబ్దాల పైచిలుకు చరిత్ర కలిగిన భాగ్యనగరంలో నేటికీ చారిత్రక సంపద బయటపడుతూనే ఉంది. కొద్ది రోజుల క్రితం పాతబస్తీలోని దూద్‌బౌలీలో ఓ ఇంటిని తవ్వుతుండగా మొఘల్, రోమన్ కాలంనాటి పాత నాణేలు, బంగారు ఆభరణాలు బయటపడిన సంగతి తెలిసిందే. అయితే ఇప్పుడు వీటిని మార్కెట్‌లో విక్రయించేందుకు యత్నించిన ఇద్దరు వ్యక్తులను పోలీసులు అరెస్టు చేశారు.
      చారిత్రక కట్టడం చార్మినార్ నుంచి దాదాపు రెండు కిలోమీటరు దూరంలోనున్న దూద్‌బౌలీలో ఓ ఇంటిని తవ్వుతుండగా దాదాపు రూ. 7 కోట్ల విలువైన పాతకాలపు నాణేలు, బంగారు ఆభరణాలు బయటపడ్డాయంటే, గోల్కొండ ఆవరణలో, పరిసర ప్రాంతాల్లో, అలాగే చార్మినార్ పరిసర ప్రాంతాల్లో నేటికీ చారిత్రక వైభవాన్ని తలపింపజేసే పాతకాలపు ఇళ్లలో, ఇతర నిర్మాణాల్లో ఎంత విలువైన సంపద దాగి ఉందోనన్న అనుమానాలు వ్యక్తమవుతున్నాయి. చార్మినార్, గోల్కొండ, సెవెన్ టూంబ్స్ వంటి భారీ చారిత్రక కట్టడాలేగాక, చిన్నా చితకా హెరిటేజ్ భవనాలతో మొత్తం నగరంలో దాదాపు నాలుగు వందల పైచిలుకు భవనాలున్నాయి.

         వీటిలో కొన్ని ప్రస్తుతం శిథిలావస్థలో ఉండగా, మరికొన్ని స్వల్పంగా దెబ్బతిని ఉన్నాయి. ఈ పాతకాలపు భవనాల్లో నేటికీ పూర్వీకుల సెంటిమెంట్ అంటూ అందులో నివాసమున్న కుటుంబాలు ఇంకా ఖాళీ చేయటం లేదు. వర్షాకాలం పెను ప్రమాదం పొంచి ఉందంటూ బల్దియా అధికారులు ఎన్నోసార్లు హెచ్చరికలు జారీచేసినా, వారు ఖాళీ చేయకపోవటం వాటిలో చారిత్రక సంపద లభ్యమవుతుందా? అన్న అనుమానాలకు బలాన్ని చేకూర్చుతున్నాయి.
         ఈ క్రమంలో నగరంలోని పలు చారిత్రక కట్టడాల ఆవరణల్లో అన్వేషణ ప్రారంభించాలని పురావస్తుశాఖ అధికారులు యోచిస్తున్నట్లు సమాచారం. కొద్ది నెలల ముందు నిధి, పాతకాలం నాటి సొరంగం ఉందని అనుమానిస్తూ బిర్లా మందిర్ సమీపంలో అధికారులు తవ్వకాలు జరిపిన సంగతి తెల్సిందే!
ఇక పోలీసు శాఖ పాతకాలపు చారిత్రక సంపద లభ్యమైనా, దాన్ని రహస్యంగా దాచుకుని విక్రయించే వారి సమాచారమిస్తే చర్యలు తీసుకుంటామంటోంది. 

...avnk