Posted: 04/13/2012 08:21 PM IST

రాజీవ్ గాంధీ అంతర్జాతీయ విమానాశ్రయం ఈ ఏడాదిలో లాభాల్లోకి వస్తుంద ని ఈ విమానాశ్రయాన్ని నిర్వహిస్తున్న జిఎంఆర్ హైదరాబాద్ ఎయిర్‌పోర్ట్ ఇంటర్నేషన్ (జిహెచ్ఐఎల్) చీఫ్ ఎగ్జిక్యూటివ్ ఆఫీసర్ విక్రమ్ జైసింఘానియా తెలిపారు. గత ఆర్థిక సంవత్సరంలోనే (2011-12) ఈ విమానాశ్రయం బ్రేక్ ఈవెన్‌ను సాధించిందని, త్వరలోనే అన్ని వివరాలు వెల్లడించనున్నట్టు ఆయన ఇక్కడ గురువారం విలేకరుల సమావేశంలో తెలిపారు.

హైదరాబాద్ విమానాశ్రయం సర్వీసులు ప్రారంభించిన నాలుగేళ్ల తరువాత బ్రేక్ఈవెన్‌ను సా«ధించినట్టు చెప్పారు. గత ఆర్థిక సంవత్సరంలో హైదరాబాద్ ఎయిర్‌పోర్ట్ ద్వారా 86 లక్షల మంది రాకపోకలు సాగించారని, వీరిలో అంతర్జాతీయ ప్రయాణికుల సంఖ్య 19 లక్షలుగా ఉన్నారన్నారు. గత ఏడాది కాలం లో ప్రయాణికుల సంఖ్యలో వృద్ధి 16 శాతంగా ఉందని చెప్పారు. దేశీయ విమానయాన పరిశ్రమలో నెలకొన్న పరిస్థితుల కారణంగా ఈ ఏడాదిలో ఆశించిన వృద్ధి రేటు సాధించడం సవాల్‌గా మారనుందని ఆయన పేర్కొన్నారు.

గత ఏడాదిలో అంతర్జాతీయ ప్రయాణికులు సంఖ్య పెద్దగా పెరగలేదని, దేశీయంగా ప్రయాణికుల సంఖ్య అధిక కావడమే ప్రస్తుత వృద్ధికి దోహదపడినట్టు విక్రమ్ చెప్పారు. ఈ ఏడాది ప్రయాణికుల సంఖ్యలో 8-10 శాతం వృద్ధిని ఆశిస్తున్నామన్నారు. ప్రస్తుత ఆర్థిక సంవత్సరం ప్రథమార్ధం కన్నా ద్వితీయార్ధంలో మెరుగైన వృద్ధిని సాధిస్తామన్న అంచనా ఉందన్నారు. ఢిల్లీ విమానాశ్రయం తరువాత హైదరాబాద్ విమానాశ్రయం వేగం గా వృద్ధి చెందుతున్నట్టు తెలిపారు. ఈ ఏడాదిలో పలు దేశాలతో ద్వైపాక్షిక సంబంధాలు కుదురుతాయని ఆశిస్తున్నామని, దీని వల్ల మరిన్ని అంతర్జాతీయ సర్వీసులను కూడా ఇక్కడి నుంచి నడిపేందుకు ఆస్కారం ఉంటుందన్నారు.