మేయర్ పదవికి బండ కార్తీకరెడ్డి రాజీనామా చేశారు. సోమవారం మధ్యాహ్నం రాజీనామా పత్రాన్ని తన చాంబర్‌లోనే గ్రేటర్ కమిషనర్ కృష్ణబాబుకు అందజేశారు. కాంగ్రెస్-ఎంఐఎం ఒప్పందంలో భాగంగా తొలి రెండేళ్ల గడువు తీరడంతో కార్తీక రాజీనామాకు సిద్ధమవడం తెలిసిందే. వ్యక్తిగత కారణాలతో పదవి నుంచి వైదొలుగుతున్నట్లు రాజీనామా లేఖలో పేర్కొన్నారు. రాజీనామా సమయంలో పలువురు కాంగ్రెస్ కార్పొరేటర్లతో సహా టీడీపీ, బీజేపీ పక్ష నాయకులు మేయర్ చాంబర్‌కు వచ్చారు. తన రాజీనామాపై నిర్ణయానికి వీలుగా ఈ నెల 17న ఉదయం 10.30 గంటలకు కౌన్సిల్ ప్రత్యేక సమావేశాన్ని.. రాజీనామా కన్ఫర్మేషన్, గత జనరల్ బాడీ సమావేశంలో తీసుకున్న నిర్ణయాల ఆమోదం కోసం 11 గంటలకు సాధారణ సమావేశాన్ని ఏర్పాటు చేసినట్లు కూడా రాజీనామా లేఖలోనే పేర్కొన్నారు.

తాను రాజీనామా చేశాక.. దానిపై నిర్ణయం తీసుకునేందుకు జీహెచ్‌ఎంసీ నిబంధనల మేరకు వారం గడువు అవసరమైనందున, ప్రస్తుతం పార్లమెంట్ సమావేశాలు జరుగుతున్నందున.. అన్నింటినీ పరిగణనలోకి తీసుకొని 17న ప్రత్యేక సమావేశాన్ని నిర్వహిస్తున్నట్లు కార్తీక విలేకరుల సమావేశంలో తెలిపారు. అదేరోజు ప్రత్యేక సమావేశాన్ని, సాధారణ సమావేశాన్ని నిర్వహిస్తున్నందున రాజీనామాపై నిర్ణయం.. కన్ఫర్మేషన్ రెండూ ఒకేరోజు జరుగనున్నాయి. అంతకు ముందు రోజు అంటే.. 16న డిప్యూటీ మేయర్ పదవికి జాఫర్ హుస్సేన్ రాజీనామా చేస్తారని ఆమె ఒక ప్రశ్నకు సమాధానంగా చెప్పారు. డిప్యూటీ మేయర్ రాజీనామాను మేయరే ఆమోదించాల్సి ఉన్నందున 17 నాటికి ఆ ప్రక్రియ కూడా పూర్తి కానుంది. అనంతరం, ఖాళీ అయిన ఆ స్థానాలకు తిరిగి ఎన్నికలు నిర్వహించాలని జీహెచ్‌ఎంసీ ప్రభుత్వానికి నివేదించడం, ఎన్నికల కమిషన్ ఎన్నికల ప్రక్రియకు సిద్ధమవడం జరుగుతాయి.