సైరా కి నో.. మళయాళంకు రెహ్మాన్ యస్!

Posted: 11/30/2017 11:39 AM IST

చిరంజీవి 151వ సినిమాగా 'సైరా' త్వరలో సెట్స్ పైకి వెళ్లనుంది. ఈ సినిమా కోసం భారీ తారాగణాన్ని తీసుకున్నారు. జాతీయస్థాయిలో ఈ సినిమాను విడుదల చేయాలనే ఆలోచనతో టెక్నీషియన్స్ విషయంలోనూ రాజీ పడటం లేదు. ఈ నేపథ్యంలోనే సంగీత దర్శకుడిగా ఏ.ఆర్.రెహ్మాన్ ను అనుకున్నారు.

అయితే కారాణాలేవీ చెప్పకుండా అనూహ్యంగా ఆ చిత్రం నుంచి వెళ్లిపోయి అందరినీ ఆశ్చర్యపరిచాడు రెహ్మాన్. ఓ మ్యూజిక్ కన్సర్ట్ నిమిత్తం హైదరాబాద్ వచ్చిన రెహ్మాన్, ఈ సినిమాకి తాను పనిచేయడం లేదని చెప్పాడు. చిరంజీవి అంటే తనకి ఎంతో అభిమానమనీ, ఆయన సినిమాకి పనిచేసే ఛాన్స్ వచ్చినా బిజీ షెడ్యూల్ కారణంగా చేయలేకపోతున్నానని అన్నాడు. ఇదిలా ఉన్న సమయంలోనే తాజాగా ఓ మళయాళ చిత్రాన్ని ఒప్పుకోవటం ఇప్పుడు చర్చనీయాంశంగా మారింది.

పృథ్వీరాజ్ హీరోగా 'ఆడు జీవితం' అనే సినిమాకి సంగీతాన్ని అందించడానికి అంగీకరించాడు. 1992లో మోహన్ లాల్ హీరోగా వచ్చిన యోధ చిత్రం తర్వాత మళ్లీ ఇన్నాళ్లకు రెహ్మాన్ ఓ మాలీవుడ్ చిత్రానికి మ్యూజిక్ అందించబోతున్నాడు. బ్లెస్సీ డైరెక్షన్ లో బెన్యామిన్ అనే నవల ఆధారంగా ఈ చిత్రం తెరకెక్కబోతుంది. పృథ్వీ ఇందులో గొర్రెల కాపరిగా కనిపించబోతున్నాడని సమాచారం. సినిమాకి డేట్స్ ఖాళీ లేవని చెప్పిన రెహమాన్ ఇప్పుడు పృథ్వీ సినిమాకి ఓకే చెప్పడం అనుమానాలను రెకెత్తిస్తోంది.