బ్రహ్మోత్సవం దెబ్బ మరిచిపోలేదా?

Posted: 10/25/2016 05:25 PM IST

Mahesh murugadoss movie satilite rights record price

సినిమా సెట్స్ మీద ఉండగానే రికార్డు మోతలు మోగించాలన్న ప్రయత్నం తర్వాత బెడిసి కొట్టడం ఈ మధ్య మనం చూస్తున్నాం. సినిమా హక్కుల విషయంలో అడ్డగోలు రేట్లు పెట్టి ఆపై కలెక్షన్లు రాక డిస్ట్రిబ్యూటర్లు బొక్కాబోర్లా పడటం తెలిసిందే. ఇది చాలదన్నట్లు బుల్లితెరపై కూడా వాటికి ఘోర పరాభవాలే మిగులుతున్నాయి.

స్టార్ హీరోలనే ఒకే ఒక్క కారణంతో వారి చిత్రాలను నిర్మాణ దశలో ఉండగానే పోటీ పడి కోట్లకు కోట్లు కుమ్మరించి కొనేస్తున్నాయి చానెళ్లు. తాజాగా బ్రహ్మోత్సవం విషయంలో జరిగిన ఉదంతమే దీనికి నిదర్శనం. సూపర్ స్టార్ మహేష్ బాబు నటించిన ఈ చిత్రం భాక్స్ పీష్ వద్ద బోల్తా పడగా, ఈ మధ్యే టెలివిజన్ లో ప్రసారం చేయగా ఈ యేడాది అతి తక్కువ టీఆర్పీ(7.2) నమోదు చేసిన చిత్రంగా మరో రికార్డు క్రియేట్ చేసింది. ఈ చిత్రం కోసం సదరు ఛానెల్ వారు 11.20 కోట్లు చెల్లించడం విశేషం. ఇక మరో భారీ చిత్రం సర్దార్ గబ్బర్ సింగ్ విషయంలో కూడా మరో ఛానెల్ కి ఇలాంటి అనుభవమే ఎదురైంది.

ఇక ఇప్పుడు మహేష్ - మురగదాస్ చిత్రం చిత్రీకరణలో ఉండగానే రికార్డు ధరకి అమ్ముడు పోయిందన్న వార్త సెన్సేషన్ క్రియేట్ చేస్తోంది. ఓ ప్రముఖ ఛానెల్ నెట్ వర్క్ వాళ్లు సుమారు 26.5 కోట్లకు ఈ బైలింగువల్ హక్కులను సొంతం చేసుకున్నారంట. ఫస్ట్ లుక్ కూడా విడుదల కానీ ఈ సినిమాకు తెలుగు - తమిళ శాటిలైట్ రైట్స్ కోసం 21 కోట్లు కాగా మిగిలిన ఐదు కోట్ల రూపాయలూ హిందీ డబ్బింగ్ రైట్స్ కోసమని తెలుస్తోంది. ఆ లెక్కన దాదాపు కేవలం తెలుగు కోసమే పది కోట్ల పైగానే అన్న మాట. కేవలం క్రేజ్ మాత్రమేనమ్ముకుంటున్న ఆయా ఛానెళ్లు ఒకటి కాకపోతే మరోకటి అన్న చందాన ఇలా ఓవర్ బిజినెస్ తో చేతులు కాల్చుకుంటున్నాయని పలువురు సినీ పండితులు అభిప్రాయపడుతున్నారు.