మణిసార్ కాపీ కొడతాడా?

Posted: 07/09/2016 12:30 PM IST

హృదయాలను హత్తుకునే ప్రేమ కావ్యాలే కాదు... వివాదాస్పద సబ్జెక్టులను తెరకెక్కించడంలో మణిరత్నం స్టైలే వేరు. చాలా కాలంగా వరుస ఫ్లాపులతో సతమతమయిన ఈ స్టార్ డైరక్టర్ ఓకే బంగారం లాంటి లో బడ్జెట్  ప్రేమకథతో పెద్ద హిట్టే అందుకున్నాడు. ఇక ఇప్పుడు కూడా మరో లవ్ స్టోరీతోనే రాబోతున్నాడు.  

కార్తీ, హైదరాబాదీ అమ్మాయి అధితి రావ్ హైదరీ ప్రధాన పాత్రలో కాట్రూ వెలియిదై చిత్రాన్ని తెరకెక్కించబోతున్నాడని తెలిసిందే. ఈ చిత్రం కథ దాదాపు క్రిష్ దర్శకత్వంలో వచ్చిన కంచె లాగానే ఉండబోతుందని తెలుస్తోంది. ఇందులో కార్తీ యుద్ధ పైలెట్ గా, అతిథి ఓ డాక్టర్ గా కనిపించబోతుందట. యుద్ధ సమయంలో ఒకరినొకరు చూసుకోవటం ద్వారా మొదలయ్యే వీళ్ల ప్రేమకథ ఎలా సాగుతుంది... చివరకు ఎలాంటి ట్విస్ట్ తో ముగుస్తుంది అనే కాన్సెప్ట్ తో సినిమా తెరకెక్కనున్నట్లు సమాచారం.

కాగా, రెండో ప్రపంచ యుద్ధ నేపథ్యంలో క్రిష్ కంచెను అల్లాడనేది అందరికీ తెలిసిందే. ఈ యూనిక్ కాన్సెప్ట్ కి జనాలు నీరాజనాలు పలకడంతోపాటు, ప్రాంతీయ చిత్రంగా ఏకంగా జాతీయ అవార్డు దక్కింది. ఇక మణిరత్నం కూడా ఇదే కాన్సెప్ట్ తో చిత్రం తెరకెక్కించబోతుండటం ఇప్పుడు చర్చనీయాంశంగా మారింది. భారీ బడ్జెట్ తో తెరకెక్కనున్న ఈ చిత్రానికి ఏఆర్ రెహమాన్ సంగీతం అందిస్తుండగా,  షూటింగ్ త్వరలో ప్రారంభం కాబోతుంది.