‘జనతా గ్యారెజ్’ వల్ల ఏకంగా 4 కోట్లు?

Posted: 03/22/2016 12:13 PM IST

మలయాళం సూపర్ స్టార్ మోహన్ లాల్ తెలుగులో నటిస్తున్న తాజా చిత్రం ‘జనతా గ్యారేజ్’. ప్రముఖ దర్శకుడు కొరటాల శివ దర్శకత్వంలో యంగ్ టైగర్ ఎన్టీఆర్ హీరోగా రూపొందుతున్న ఈ చిత్రంలో మోహన్ లాల్ ఓ కీలక పాత్రలో నటిస్తున్నాడు. ప్రస్తుతం ఈ చిత్ర షూటింగ్ శరవేగంగా జరుగుతోంది. మైత్రీ మూవీ మేకర్స్ సంస్థ ‘జనతా గ్యారేజ్’ చిత్రాన్ని నిర్మిస్తోంది.

అయితే ఈ సినిమా ద్వారా మోహన్ లాల్ కు దాదాపుగా 4 కోట్ల రూపాయల లాభం వచ్చినట్లుగా తెలుస్తోంది. తాజా సమాచారం ప్రకారం... ఈ సినిమాలో నటించేందుకు మోహన్ లాల్ కు ‘జనతా గ్యారేజ్’ నిర్మాతలు 1.5 కోట్ల రూపాయలతో పాటు మలయాళ హక్కులను కూడా ఆఫర్ చేసారట. మలయాళ హక్కులు ఓ కోటి రూపాయలు పలుకుతాయని భావించిన నిర్మాతలకు దిమ్మతిరిగిపోయే షాక్ ఇచ్చింది మలయాళ ఇండస్ట్రీ.

మలయాళంలో మోహన్ లాల్ కు భారీ క్రేజ్ వున్న విషయం తెలిసిందే. అందుకు ఈ చిత్ర మలయాళ హక్కులు ఏకంగా 4 కోట్లకు అమ్ముడుపోయి, మోహన్ లాల్ కు భారీ లాభాలను తెచ్చిపెట్టినట్లుగా తెలుస్తోంది. దీంతో మలయాళంలో కూడా ఈ సినిమాను భారీ ఎత్తున విడుదల చేసేందుకు సన్నాహాలు మొదలయ్యాయి.

భారీ అంచనాలతో రూపొందుతున్న ఈ చిత్రంలో యంగ్ టైగర్ చాలా కొత్తగా కనిపించనున్నాడు. ఈ చిత్రాన్ని త్వరలోనే తెలుగుతో పాటు తమిళం, మలయాళం భాషలలో ప్రపంచ వ్యాప్తంగా విడుదల చేయడానికి సన్నాహాలు చేస్తున్నారు.