ఎన్టీఆర్ సినిమాలో నజ్రియా మొగుడు?

Posted: 12/30/2015 05:11 PM IST

‘మిర్చి’, ‘శ్రీమంతుడు’ వంటి వరుస బ్లాక్ బస్టర్ హిట్ చిత్రాలతో దూసుకుపోతున్న దర్శకుడు కొరటాల శివ దర్శకత్వంలో యంగ్ టైగర్ ఎన్టీఆర్ హీరోగా తెరకెక్కనున్న తాజా చిత్రం ‘జనతా గ్యారేజ్’. ఇందులో మలయళ సూపర్ స్టార్ మోహన్ లాల్ ఓ ప్రధాన పాత్రలో నటించనున్నాడు. ప్రస్తుతం ఈ సినిమా కోసం మోహన్ లాల్ తెలుగు నేర్చుకునే పనిలో బిజీగా వున్నాడు.

ఇదిలా వుంటే ఇందులో మరో మలయాళ హీరో నటించనున్నాడని తెలిసింది. ఇందులోని ఓ కీలక పాత్ర కోసం మలయాళ నటుడు ఫహద్ ఫాజిల్ ను తీసుకున్నారని సమాచారం. ఇటీవలే తన క్యారెక్టర్ నచ్చడంతో ఫహద్ వెంటనే గ్రీన్ సిగ్నల్ ఇచ్చినట్లుగా తెలిసింది. త్వరలోనే ఫహద్ ఫాజిల్ కూడా ఈ సినిమా షూటింగ్ లో పాల్గొననున్నాడు. ఫహద్ ఫాజిల్ అంటే తెలుగు ప్రేక్షకులకు తెలియదు. అయితే తెలుగులో వచ్చిన ‘రాజా రాణి’ సినిమాలో ఆర్య లవర్ గా నటించిన నజ్రియానే ఫహద్ ఫాజిల్ ఇటీవలే పెళ్లి చేసుకున్నాడు.

ఎన్టీఆర్ సరసన సమంత, నిత్యామీనన్ లు హీరోయిన్లు గా నటించనున్నారు. భారీ అంచనాలతో రూపొందనున్న ఈ ప్రాజెక్టును మైత్రీ మూవీ మేకర్స్ సంస్థ నిర్మించనున్నారు. ఈ ప్రాజెక్టు ఫిబ్రవరి నెలలో సెట్స్ పైకి వెళ్లనుంది. ఆగష్టులో విడుదల చేయడానికి సన్నాహాలు చేస్తున్నారు. ప్రస్తుతం ఈ ప్రాజెక్టుకు సంబంధించిన ప్రీ ప్రొడక్షన్ కార్యక్రమాలు శరవేగంగా జరుగుతున్నాయి. త్వరలోనే అన్ని వివరాలు అదికారికంగా ప్రకటించనున్నారు.

ప్రస్తుతం ఎన్టీఆర్ నటిస్తున్న ‘నాన్నకు ప్రేమతో’ విడుదలకు సిద్దమవుతోంది. సుకుమార్ దర్శకత్వంలో తెరకెక్కుతున్న ఈ చిత్రంలో రకూల్ ప్రీత్ సింగ్ హీరోయిన్ గా నటిస్తుంది. ఇటీవలే విడుదలైన పాటలు, ట్రైలర్లకు భారీ రెస్పాన్స్ వస్తోంది. సంక్రాంతి కానుకగా జనవరి 13న ప్రపంచ వ్యాప్తంగా గ్రాండ్ గా ఈ చిత్రాన్ని విడుదల చేయడానికి సన్నాహాలు చేస్తున్నారు.