యంగ్ టైగర్ తో బాలీవుడ్ భామ రొమాన్స్ ?

Posted: 10/28/2015 12:47 PM IST

యంగ్ టైగర్ ఎన్టీఆర్ హీరోగా కొరటాల శివ దర్శకత్వంలో ఓ చిత్రం తెరకెక్కనున్న విషయం తెలిసిందే. ఈ చిత్ర ముహూర్త కార్యక్రమాలు ఇటీవలే లాంఛనంగా జరిగాయి. ‘మిర్చి’, ‘శ్రీమంతుడు’ చిత్రాలతో వరుస హిట్స్ ను అందుకున్న కొరటాల శివ దర్శకత్వంలో రూపొందనున్న ఈ చిత్రానికి ‘జనత గ్యారేజ్’ (వర్కింగ్ టైటిల్) అనే టైటిల్ ను పరిశీలిస్తున్నారు.

‘శ్రీమంతుడు’ చిత్రాన్ని నిర్మించిన మైత్రీ మూవీ మేకర్స్ సంస్థ ఈ చిత్రాన్ని నిర్మిస్తున్నారు. అయితే ఇందులో ఎన్టీఆర్ సరసన ముందుగా శృతిహాసన్ ను హీరోయిన్ గా అనుకున్నట్లుగా వార్తలొచ్చాయి. అయితే తాజా సమాచారం ప్రకారం బాలీవుడ్ యంగ్ బ్యూటీ పరిణితీ చోప్రాను హీరోయిన్ గా ఎంపిక చేసే పనిలో చిత్ర యూనిట్ వున్నట్లుగా తెలిసింది.

ప్రస్తుతం పరిణితీతో చిత్ర యూనిట్ చర్చలు జరుపుతున్నట్లుగా తెలిసింది. మరి పరిణితీ గ్రీన్ సిగ్నల్ ఇస్తే త్వరలోనే అధికారికంగా ప్రకటించనున్నారు. ప్రస్తుతం ఎన్టీఆర్ నటిస్తున్న ‘నాన్నకు ప్రేమతో’ చిత్ర షూటింగ్ శరవేగంగా జరుగుతోంది. సుకుమార్ దర్శకత్వంలో రూపొందుతున్న ఈ చిత్రాన్ని త్వరలోనే ప్రేక్షకుల ముందుకు తీసుకురానున్నారు.