‘కత్తి’ దర్శకుడితో మహేష్ సినిమా?

Posted: 10/08/2015 10:35 AM IST

‘శ్రీమంతుడు’ చిత్రం తర్వాత ప్రిన్స్ మహేష్ బాబు నటిస్తున్న తాజా చిత్రం ‘బ్రహ్మోత్సవం’. శ్రీకాంత్ అడ్డాల దర్శకత్వంలో రూపొందుతున్న ఈ చిత్రాన్ని భారీ బడ్జెట్ చిత్రాల నిర్మాణ సంస్థ పివిపి బ్యానర్ పై ప్రసాద్.వి.పోట్లూరి నిర్మిస్తున్నారు.

‘బ్రహ్మోత్సవం’ తర్వాత మహేష్ నటించబోయే సినిమాపై రకరకాల వార్తలు వినిపిస్తున్నాయి. ‘బ్రహ్మోత్సవం’ తర్వాత మహేష్ తో సినిమా చేయడానికి పూరీ జగన్నాథ్, త్రివిక్రమ్, వినాయక్, రాజమౌళి వంటి దర్శకులు సిద్ధంగా వున్నారు. కానీ మహేష్ మాత్రం తమిళ దర్శకుడికి గ్రీన్ సిగ్నల్ ఇచ్చినట్లుగా తెలిసింది.

‘గజిని’, ‘తుపాకీ’, ‘కత్తి’ వంటి భారీ బ్లాక్ బస్టర్ హిట్ చిత్రాలతో దర్శకుడిగా తనకంటూ ఓ ప్రత్యేక స్థానాన్ని సొంతం చేసుకున్న దర్శకుడు మురుగదాస్ కు మహేష్ తాజాగా గ్రీన్ సిగ్నల్ ఇచ్చినట్లుగా తెలిసింది. ఇటీవలే మురుగదాస్ చెప్పిన స్టోరీలైన్ మహేష్ కు బాగా నచ్చడంతో వెంటనే గ్రీన్ సిగ్నల్ ఇచ్చేసాడని, దాదాపు ఈ ప్రాజెక్టు ఖరారు అయినట్లుగా తెలిసింది.

తెలుగు, తమిళం భాషలలో ఏకకాలంలో రూపొందనున్న ఈ ప్రాజెక్టును ప్రముఖ నిర్మాతలు ఆర్.బి.చౌదరి, ఎన్వీ ప్రసాద్ లు సంయుక్తంగా నిర్మించనున్నారు. ఈ ప్రాజెక్టుకు సంబంధించిన అన్ని వివరాలు త్వరలోనే అధికారికంగా ప్రకటించనున్నారు.