సర్దార్ గా మారుతున్న గబ్బర్ సింగ్2?

Posted: 07/23/2015 11:38 AM IST

పవర్ స్టార్ పవన్ కళ్యాణ్ హీరోగా ‘పవర్’ చిత్ర ఫేం బాబీ దర్శకత్వంలో ఓ చిత్రం తెరకెక్కుతున్న విషయం తెలిసిందే. ప్రముఖ నిర్మాత శరత్ మరార్ ఈ చిత్రాన్ని నిర్మిస్తున్నారు. అనీషా అంబ్రోస్ హీరోయిన్. యంగ్ రాకింగ్ మ్యూజిక్ డైరెక్టర్ దేవిశ్రీప్రసాద్ సంగీతం అందిస్తున్నాడు.

మొన్నటి వరకు ఈ చిత్రానికి ‘గబ్బర్ సింగ్2’ అనే టైటిల్ ను అనుకున్నారు. కానీ తాజాగా ఈ చిత్రానికి ‘సర్దార్’ అనే టైటిల్ ను ఖరారు చేసినట్లుగా వార్తలు వినిపిస్తున్నాయి. అయితే ఈ టైటిల్ ను పవన్ తన సొంత బ్యానర్ పై రిజిస్టర్ చేయించడంతో అభిమానులు అయోమయంలో పడ్డారు. మరి ‘సర్దార్’ టైటిల్ ‘గబ్బర్ సింగ్2’ స్థానంలో వస్తుందో లేక పవన్ కళ్యాణ్ నటించబోయే మరో కొత్త సినిమాకు సర్దార్ టైటిల్ వినియోగిస్తారో త్వరలోనే తెలియనుంది.

ఇటీవలే షూటింగ్ ప్రారంభమయ్యింది. జులై నెల చివర్లో నుంచి గుజరాత్ లో షూటింగ్ ప్రారంభం కానుంది. ఈ సినిమా కోసం పవన్ కళ్యాణ్ గతకొద్ది రోజులుగా బెంగళూర్ లో తన బాడీని ఫిట్ గా చేసుకునే ప్రయత్నాలు చేస్తున్నారు. గుజరాత్ లో జరిగే షెడ్యూల్ జులై చివరి వారం నుంచి దాదాపు 40 రోజుల పాటు శరవేగంగా షూటింగ్ జరుగనుందని సమాచారం. ఇందులో విలన్ గా మరాఠీ నటుడు శరత్ కేల్కర్ నటిస్తున్నాడు.

కమర్షియల్ యాక్షన్ ఎంటర్ టైనర్ గా రూపొందుతున్న ఈ చిత్రాన్ని వచ్చే సంవత్సరం సంక్రాంతి కానుకగా విడుదల చేయడానికి చిత్ర యూనిట్ సన్నాహాలు చేస్తున్నారు. హై వోల్టేజ్ యాక్షన్ ఎంటర్ టైనర్ గా రూపొందుతున్న ఈ చిత్రం కోసం దేవిశ్రీప్రసాద్ అదిరిపోయే సంగీతాన్ని, బ్యాగ్రౌండ్ మ్యూజిక్ ను అందిస్తున్నారు. ఈ చిత్రానికి సంబంధించిన మరిన్ని వివరాలు త్వరలోనే అధికారికంగా ప్రకటించనున్నారు.