ఫ్లాప్ డైరెక్టర్ తో సాయిధరమ్ తేజ్ సినిమా

Posted: 07/14/2015 01:37 PM IST

‘పిల్లా నువ్వులేని జీవితం’ సినిమాతో తెలుగు ఇండస్ట్రీలోకి హీరోగా ఎంట్రీ ఇచ్చిన మెగాహీరో సాయిధరమ్ తేజ్ ప్రస్తుతం వరుస సినిమాలతో బిజీ అవుతున్నాడు. ‘పిల్లా నువ్వులేని జీవితం’ తర్వాత సాయిధరమ్ తేజ్ ప్రస్తుతం ‘సుబ్రమణ్యం ఫర్ సేల్’ సినిమాలో నటిస్తున్నాడు.

హరీష్ శంకర్ దర్శకత్వంలో దిల్ రాజు నిర్మిస్తున్న ఈ చిత్రంలో సాయిధరమ్ తేజ్, రెజీనా జంటగా నటిస్తున్నారు. ప్రస్తుతం ఈ చిత్ర షూటింగ్ శరవేగంగా జరుగుతోంది. త్వరలోనే ప్రేక్షకుల ముందుకు రానుంది. అలాగే ఈ సినిమా తర్వాత సాయిధరమ్ తేజ్ హీరోగా ‘పటాస్’ దర్శకుడు అనిల్ రావిపూడి దర్శకత్వంలో ఓ సినిమా చేయనున్నాడు. ఈ చిత్రాన్ని కూడా దిల్ రాజు నిర్మించనున్నాడు.

అయితే ఈ సినిమా ఇంకా సెట్స్ పైకి వెళ్లకముందే సాయిధరమ్ తేజ్ మరో కొత్త ప్రాజెక్టుకు గ్రీన్ సిగ్నల్ ఇచ్చేసాడు. గతంలో కళ్యాణ్ రామ్ తో ‘ఓం’ వంటి విభిన్న చిత్రాన్ని తెరకెక్కించిన దర్శకుడు సునీల్ రెడ్డి ఇటీవలే సాయిధరమ్ తేజ్ కు ఓ కథను వినిపించాడట. ఆ కథ నచ్చడంతో వెంటనే సునీల్ రెడ్డికి సాయిధరమ్ తేజ్ గ్రీన్ సిగ్నల్ ఇచ్చినట్లుగా సమాచారం.

ఈ చిత్రాన్ని కమర్షియల్ యాక్షన్ లవ్ ఎంటర్ టైనర్ గా రూపొందించబోతున్నట్లుగా తెలిసింది. అలాగే శ్రీలంక పరిసర ప్రాంతాల్లో ఈ చిత్ర షూటింగ్ జరిపేందుకు సన్నాహాలు చేస్తున్నారు. త్వరలోనే ఈ చిత్రానికి సంబంధించిన అన్ని వివరాలు అధికారికంగా ప్రకటించనున్నారు.