బాహుబలి ఆడియో వేదిక విశేషాలు

Posted: 05/25/2015 04:01 PM IST

ప్రభాస్, రానా, అనుష్క, తమన్నా ప్రధాన పాత్రలలో ఎస్.ఎస్.రాజమౌళి దర్శకత్వంలో తెరకెక్కుతున్న ప్రతిష్టాత్మక చిత్రం ‘బాహుబలి ది బిగినింగ్’. భారీ బడ్జెట్ తో ఆర్కా మీడియా సంస్థ నిర్మిస్తున్న ఈ చిత్రానికి ఎం.ఎం.కీరవాణి సంగీతం అందిస్తున్నారు. ఈ చిత్ర ఆడియో విడుదల కార్యక్రమం ఈనెల 31న భారీ ఎత్తున విడుదల కానున్న విషయం తెలిసిందే.

కీరవాణి స్వరపరిచిన ‘బాహుబలి -ది బిగినింగ్’ పాటలను గ్రాండ్ గా విడుదల చేయనున్నారు. ఈ ఆడియో విడుదల కార్యక్రమానికి సౌత్ ఇండస్ట్రీకి సంబంధించిన పలువురు స్టార్, అగ్ర సినీ ప్రముఖులు, అలాగే బాలీవుడ్ అగ్ర సినీ ప్రముఖులు హాజరుకానున్నారని సమాచారం. ఇందుకోసం ఏర్పాట్లు మొదలయ్యాయి.

ఈ ఆడియో వేడుక కోసం హైదరాబాద్ లోని హైటెక్స్ ఓపెన్ గ్రౌండ్స్ ను ఖరారు చేసినట్లుగా తెలిసింది. ఈ వేడుకకు అభిమానులు భారీ సంఖ్యలో హాజరుకాబోతుండటంతో హైటెక్స్ ఓపెన్ గ్రౌండ్స్ ను ఎంపిక చేసినట్లుగా తెలిసింది. అంతే కాకుండా సౌత్, నార్త్ సినీ ఇండస్ట్రీకి సంబంధించిన అగ్ర, స్టార్ సినీ ప్రముఖులు హాజరుకానున్న నేపథ్యంలో భారీ ఏర్పాట్లు చేస్తున్నారు.

ఈ ఆడియో వేడుకలోనే ‘బాహుబలి -ది బిగినింగ్’ థియేటర్ ట్రైలర్ ను కూడా విడుదల చేస్తుండటంతో ఓ భారీ LED స్క్రీన్ ను కూడా ఏర్పాటు చేస్తున్నారు. ఈ ఆడియో వేడుకకు హీరో నాని వ్యాఖ్యతగా వ్యవహరించనున్నాడు. అలాగే ఇదే వేదికపై కీరవాణికి ఘన సన్మానం కూడా జరుగనుందని సమాచారం. త్వరలోనే అన్ని వివరాలు అధికారికంగా ప్రకటించనున్నారు.

ఈ చిత్రంలో రమ్యకృష్ణ, నాజర్, సుధీప్, సత్యరాజ్ తదితరులు కీలక పాత్రలలో నటించారు. భారీ అంచనాలతో రూపొందుతున్న ఈ చిత్రాన్ని జులై 10న ప్రపంచ వ్యాప్తంగా తెలుగు, తమిళ, హిందీ భాషలలో ఏకకాలంలో భారీ ఎత్తున విడుదల చేయనున్నారు.