లారెన్స్ దర్శకత్వంలో పటాస్ తమిళ రీమేక్

Posted: 05/08/2015 04:18 PM IST

నందమూరి కళ్యాణ్ రామ్ కు చాలా కాలం తర్వాత భారీ బ్లాక్ బస్టర్ హిట్టును అందించిన చిత్రం ‘పటాస్’. కళ్యాణ్ రామ్ తన సొంత బ్యానరైన నందమూరి ఎన్టీఆర్ ఆర్ట్స్ బ్యానర్లో నిర్మించాడు. అనిల్ రావిపూడి దర్శకత్వం వహించాడు. భారీ కలెక్షన్లతో ఈ ఏడాది ప్రారంభానికి భారీ పటాసును పేల్చి ఘనవిజయాన్ని అందించింది.

అయితే ఈ చిత్రాన్ని తమిళంలో రీమేక్ చేయడానికి అక్కడి నిర్మాతలు ప్రయత్నిస్తున్నారు. తాజాగా ఈ చిత్ర తమిళ రీమేక్ హక్కులను ప్రముఖ నిర్మాత ఆర్.బి.చౌదరి దక్కించుకున్నారు. త్వరలోనే ఈ ప్రాజెక్టును సెట్స్ పైకి తీసుకెళ్లేందుకు ప్రయత్నాలు చేస్తున్నారు.

అయితే తాజా సమాచారం ప్రకారం ‘పటాస్’ తమిళ రీమేక్ లో రాఘవ లారెన్స్ నటించనున్నాడని వార్తలొస్తున్నాయి. రాఘవ లారెన్స్ హీరోగా స్వీయ దర్శకత్వంలో ఈ రీమేక్ తెరకెక్కనుందని సమాచారం. ఇటీవలే ‘కాంచన2’ తో భారీ సక్సెస్ ను అందుకున్న లారెన్స్ ఈ ప్రాజెక్టును మరింత పవర్ ఫుల్ గా తమిళంలో తెరకెక్కించడానికి సన్నాహాలు చేస్తున్నట్లుగా తెలిసింది.

ఇంకా ఈ చిత్రంలో నటించే నటీనటులు, హీరోయిన్, సాంకేతిక నిపుణులు కన్ఫర్మ్ అవ్వలేదు. త్వరలోనే అన్ని వివరాలను అధికారికంగా ప్రకటించనున్నారు. ప్రస్తుతం లారెన్స్ దర్శకత్వంలో వచ్చిన ‘గంగ’ చిత్రం తెలుగులో కూడా మంచి వసూళ్లను రాబడుతూ హౌస్ ఫుల్ షోలతో నడుస్తోంది.