గాయకుడిగా అవతారమెత్తిన దర్శకుడు

Posted: 02/28/2015 10:52 AM IST

Director gautam menon turned singer uppu karuvadu tamil movie radhakrishna

ఇటీవలే ‘ఎన్నై అరిందల్’ చిత్రంతో విజయం సాధించిన దర్శకుడు గౌతమ్ మీనన్.. ఇప్పుడు తన గొంతును సవరించుకునే పనిలో నిమగ్నమయ్యాడు. నిన్నటివరకు వెండితెరపై తన దర్శకమాయాజాలాన్ని ప్రదర్శించిన ఈయన.. ఇప్పుడు తనలో దాగివున్న సింగింగ్ టాలెంట్ తో ప్రేక్షకులను అబ్బురపరిచేందుకు సిద్ధమవుతున్నాడని వార్తలొస్తున్నాయి.

తెలుగులో ‘గౌరవం’ చిత్రాన్ని తెరకెక్కించిన దర్శకుడు రాధాకృష్ణ తమిళంలో ‘ఉప్పు కరువాడు’ పేరిట ఓ చిత్రాన్ని రూపొందిస్తున్నాడు. ఈ సినిమాలోనే గౌతమ్ మీనన్ ఓ పాట పాడినట్లు సమాచారం! ముందుగా ఆయన పాట పాడేందుకు అంగీకరించలేదట! తన గొంతు వినసొంపుగా వుండదని, తాను పాట పాడితే దాన్ని ప్రేక్షకులు ఆస్వాదించలేరంటూ ఆయన ఒప్పుకోలేదట! అయితే.. ఈ చిత్ర సంగీత దర్శకుడైన స్టీవ్ ఎంతో కష్టపడి ఆయన్ను ఒప్పించాడట! దీంతో ఆయన పాట పాడేందుకు అంగీకరించాడని యూనిట్ బృందం అంటోంది.

ఇదే విషయమై ఆ చిత్ర దర్శకుడు రాధాకృష్ణ మాట్లాడుతూ.. గౌతం గాన ప్రతిభ తనకు తెలుసునని, కొన్ని పార్టీలలో ఆయన పాటలు పాడిన విధానం తనను ఆశ్చర్యపరిచిందని తెలిపాడు. గౌతంలో ఎవరికీ తెలియని సింగింగ్ టాలెంట్ దాగి వుందని, దాన్ని ప్రేక్షకుల ముందుకు తీసుకురావాలనే ఉద్దేశంతోనే ఆయనతో పాట పాడించాలని నిర్ణయించినట్లు కృష్ణ పేర్కొంటున్నాడు. మదన్ రచించిన ఈ పాటలో జీవితం గురించి ఆలపించినట్లు తెలుస్తోంది.

ఇదిలావుండగా.. దర్శకుడు రాధాకృష్ణ, గౌతం మీనన్ మధ్య మంచి సాన్నిహిత్యం వుంది. వీరి మధ్య వుండే ఈ స్నేహం గౌతం గొంతును సవరించడంలో సాధ్యపడుతుందని విశ్లేషకులు అంటున్నారు.