గోపాలుడిని అడ్డుకుంటున్న అదృశ్య శక్తి

Posted: 12/31/2014 04:09 PM IST

విడుదలకు సిద్ధమవుతున్న సమయంలో ‘గోపాల గోపాల’ను వివాదాలు చుట్టుముడుతున్నాయి. షూటింగు చివరి దశకు చేరుకుని.., పది రోజుల్లో సినిమా వస్తుందనగా జరుగుతున్న నిరసనలు ఆందోళన కల్గిస్తున్నాయి ‘గోపాల గోపాల’ సినిమాను నిషేధించాలంటూ వీహెచ్.పీ. భజరంగ్ దళ్, ఇతర ధార్మిక సంస్థలు సెన్సార్ బోర్డు వద్ద నిరసనలు తెలిపాయి. సినిమా పోస్టర్లు హిందువుల మనోభావాలు దెబ్బతినేలా ఉన్నాయని ఆందోళన చేపట్టాయి. దీంతో వచ్చే నెల 9న విడుదలకు సిద్దమవుతున్న సినిమాపై నీలిమేఘాలు కమ్ముకున్నాయి.

సినిమా పోస్టర్లు విడుదలై చాలా రోజులు అవుతుంది. ఇన్నిరోజులు లేని వివాదాలు, నిరసనలు చివరి సమయంలో రావటంపై అనుమానాలు వ్యక్తం అవుతున్నాయి. ఈ నిరసనల వెనుక మనోభావాల కంటే మరోకారణం ఉందని అంటున్నారు. సినిమాను అడ్డుకునే ఉద్దేశ్యంతో ఇండస్ట్రీకి చెందిన కొందరు కావాలనే ఇలా చేస్తున్నారని సోషల్ మీడియాలో కామెంట్లు వస్తున్నాయి. అయితే దీన్ని ఏ మాత్రం ధవీకరించలేము. ఇవి అభిమానులు, నెటిజన్ల వ్యక్తిగత అభిప్రాయాలే అని విశ్లేషకులు చెప్తున్నారు.

నెటిజన్ల అభిప్రాయం తప్పయితే.., సినిమాను అడ్డుకుంటున్న అదృశ్య శక్తి ఎవరో, ఏమిటో బయటకు  తెలియాల్సి ఉంది. ఫ్యాన్స్ అంతా మరో పది రోజుల్లో సినిమా వస్తుందని సంబరాలకు సిద్దమవుతుంటే ఇలాంటి ఘటనలు చోటుచేసుకోవటం బాధాకరం. ఈ గందరగోళానికి త్వరలోనే తెరపడి.., ఎలాంటి వివాదాలు లేకుండా ‘గోపాల గోపాల’ విడుదల కావాలని కోరుకుందాం.

 

కార్తిక్