శ్రీదేవిని ఎమోషనల్ గా ఏడిపించిన కెమెరామెన్!

Posted: 09/25/2014 08:17 PM IST

Senior actress sridevi cried after watching marathi movie tapal

ఒకప్పుడు తెలుగు చిత్రపరిశ్రమలో అతిలోక సుందరిగా ఓ వెలుగు వెలిగి, తన రెమ్యునరేషన్ స్థాయిని పెంచేసి ఇక్కడి నిర్మాతలను ఏడిపించిన శ్రీదేవిని తాజాగా బాలీవుడ్ కి చెందిన ఓ కెమెరామెన్ ఆమెను ఎమోషనల్ గా బాగా ఏడిపించినట్లు సమాచారం! ఆ కెమెరామెన్ ప్రత్యేకంగా శ్రీదేవికి ఫోన్ చేసిమరీ పిలిపించిన అతగాడు.. తాను తీసిన ఒక వీడియోను ఆమెను చూపించగానే ఒక్కసారిగా ఆమె ఏడ్చేసిందట! దీంతో ఇది హాట్ టాపిక్ గా మారిపోయింది. శ్రీదేవిని ఏడిపించిన ఆ కెమెరామెన్ ఎవరు..? అతను ఏ వీడియో చూపించి ఆమెను ఇంతలా ఏడిపించాడు..? అంటూ ఒక్కొక్కటిగా సందేహాలు బయటపడ్డాయి. ఈ విషయంపై మీడియా ప్రతినిధులు ఆమెను అడగగా... శ్రీదేవి జరిగిన విషయాన్ని మొత్తం విశ్లేషించింది.

అసలు జరిగిన విషయం ఏమిటంటే... బాలీవుడ్ లో ప్రముఖ ఛాయాగ్రాహకుడు అయిన లక్ష్మణ్ ఊటేకర్ మొట్టమొదటిసారిగా మెగాఫోన్ పట్టుకుని మరాఠీలో ‘‘తపాల్’’ అనే చిత్రాన్ని రూపొందించాడు. శుక్రవారం (26-09-2014) రిలీజ్ కానున్న ఈ చిత్రం ప్రీమియర్ షోను ముంబయిలో ఏర్పాటు చేశారు. ఈ కార్యక్రమానికి అతడు శ్రీదేవిని ప్రత్యేక అతిథిగా ఆహ్వానించాడు. గతంలో శ్రీదేవి నటించిన ‘‘ఇంగ్లీష్ వింగ్లీష్’’ చిత్రానికి లక్ష్మణ్ కెమెరామెన్ గా పనిచేయడంతో వారిమధ్య మంచి రిలేషన్ ఏర్పడింది. ఆ సన్నిహిత సంబంధం వుండటం వల్లే లక్ష్మణ్, శ్రీదేవిని తన ప్రీమియర్ షోకు ఆహ్వానించాడు. అనంతరం ఆ సినిమాను చూసిన ఆమె.. ఒక్కసారిగా భావోద్వేగానికి గురి అయి ఏడ్చేసింది.

ఈ చిత్రం చూసిన అనంతరం మాట్లాడిన ఆమె... ఈమధ్య తాను చూసిన సినిమాలన్నింటిలోకంటే ‘‘తపాల్’’ సినిమా ఒక్కటే ఎంతగానో కదిలించిదని పేర్కొంది. ఈ చిత్రాన్ని దర్శకుడు చాలా అద్భుతంగా తెరకెక్కించాడని ప్రశంసల వర్షం కురిపించింది. ఉత్తరాలు కనుమరుగవుతున్న ఈరోజుల్లో.. ఓ మారుమూల గ్రామానికి, ఓ పోస్ట్ మెన్ కి మధ్య వున్న సంబంధం నేపథ్యంలో ఈ సినిమాను లక్ష్మణ్ రూపొందించాడు. శ్రీదేవితోపాటు ఈ సినిమాను చూసిన ప్రముఖ సినీతారలు కూడా మంచిమార్కులే వేశారు. మరాఠీలో ఈ చిత్రం ఖచ్చితంగా విజయం సాధిస్తుందనే ధీమాను డైరెక్టర్ వ్యక్తం చేస్తున్నాడు.