రజనీకాంత్ సినిమా ఆపేయాలని ప్రేమికుల డిమాండ్

Posted: 08/27/2014 03:00 PM IST

‘కొచ్చడయాన్’ చిత్రం తర్వాత సూపర్ స్టార్ రజినీకాంత్ నటిస్తున్న తాజా చిత్రం ‘లింగా’. ప్రముఖ దర్శకుడు కె.యస్.రవికుమార్ దర్శకత్వంలో తెరకెక్కుతున్న ఈ చిత్ర షూటింగ్ కు మళ్లీ సమస్య ఏర్పడింది. ప్రస్తుతం తమిళనాడులోని లింగనమక్కి వద్ద జరుగుతున్న షూటింగ్‌పై దుమారం మొదలైంది. చిత్రీకరణను రద్దు చేయాలని పర్యావరణ ప్రేమికులు డిమాండ్ చేస్తున్నారు. పర్యాటకులను నిషేధించిన ఈ ప్రాంతంలో ప్రభుత్వం షూటింగ్‌కు అనుమతి ఇవ్వడంపై మండిపడుతున్నారు.

షూటింగ్‌ని వెంటనే రద్దు చేయాలని కోరుతూ పర్యావరణ ప్రేమికులు అదనపు కలెక్టర్ నాగరాజ్‌కు వినతిపత్రం అందజేశారు. జల విద్యుత్ కేంద్రమైన లింగనమక్కి వద్ద లింగా షూటింగ్ కోసం ప్రభుత్వం అనుమతి ఇవ్వడం సరికాదని పర్యావరణ వేత్త డిసౌజా చెప్పుకొచ్చారు. ఈ విషయంలో ప్రభుత్వం ఆలోచించుకోవాలని సూచించారు. లింగనమక్కి డ్యాం సమస్యాత్మక ప్రదేశం కావడంతోనే పర్యాటకాన్ని పూర్తిగా నిషేధించారని, అలాటప్పుడు వీడియోలు, ఫొటోలు తీయడం కూడా బ్యాన్ కిందకే వస్తుందని చెబుతున్నారు. ఈ నేపథ్యంలో ‘లింగా’ షూటింగ్ క్యాన్సిల్ అవుతుందా..? అలాగే కంటిన్యూ అవుతుందా అనేది చూడాలి.

కె.యస్. రవికుమార్ దర్శకత్వంలో తెరకెక్కుతున్న ఈ చిత్రంలో రజనీ ద్విపాత్రాభినయం చేస్తున్నాడు. రాక్ లైన్ వెంకటేష్ నిర్మిస్తున్న ఈ చిత్రంలో రజినీకాంత్ సరసన బాలీవుడ్ బ్యూటీ సోనాక్షీ సిన్హా, టాలీవుడ్ బ్యూటీ అనుష్క హీరోయిన్లుగా నటిస్తున్నారు. ఇందులో రజనీ నటన, ఫైట్స్, హీరోయిన్ల అందాలు ప్రేక్షకులను అలరిస్తాయని చిత్ర యూనిట్ చెబుతున్నారు. ఈ చిత్రంపై ఇప్పటికే భారీ అంచనాలు నెలకొన్నాయి. ‘కొచ్చడయాన్’ అట్టర్ ఫ్లాప్ అవడంతో... ఈ సినిమాను ఎలాగైనా బ్లాక్ బస్టర్ గా తెరకెక్కించాలని రజినీ తెగ ఆరాటపడుతున్నాడట. త్వరలోనే చిత్రాన్ని విడుదల చేయడానికి సన్నాహాలు చేస్తున్నారు.