తప్పు చేసి నాలిక కొరుక్కోలేదు, బాధితురాలు కొరికింది

Posted: 02/05/2014 03:41 PM IST

దంతక్షతాలు, నఖక్షతాలు- పళ్ళతోను, గోళ్ళతోనూ గాట్లు పెట్టటం భాగస్వామిని రెచ్చగొట్టేందుకు ఉపయోగపడుతుందని శృంగార కోవిదులు చెప్తారు.  అయితే వాటిని అత్యాచారానికి నిలువరించటానికి కూడా పనికివస్తాయని ఆ సమయంలో గుర్తుపెట్టుకోవటం అరుదైన విషయం.  సామాన్యంగా బలాత్కారాలలో పురుషుడి బలాన్ని చూసి మహిళలు భయాందోళనకు లోనై మానసిక స్థైర్యాన్ని కోల్పోయి, మనస్తాపానికి గురై ఏమీ చెయ్యలేక నిర్బలులవుతారు. 

కానీ బ్యూటీ పార్లల్ లో పనిచేసే 18 సంవత్సరాల మహిళ తనను గట్టిగా పట్టుకుని బలవంతంగా దగ్గరకు లాక్కుని ముద్దు పెట్టుకుంటున్న మనిషి నాలికను కటుక్కున కొరికింది.  భోపాల్ లో కమలానగర్ పోలీస్ స్టేషన్ పరిధిలో జరిగిన ఈ సంఘటనలో ఇరువురూ పోలీస్ స్టేషన్ కి వెళ్ళారు.  తప్పని సరి పరిస్థితుల్లో తప్పించుకోవటానికి మార్గం లేక నాలిక కొరికానంటుంది ఆమె.  అంతేకాదు, ఎప్పుడైనా ఎవరైనా బలవంతం చెయ్యబోతే భయపడకుండా ఇలాంటి పనిచెయ్యండని ఆమె ఇతర అమ్మాయిలకు చెప్తోంది.  అతను కొద్దికాలంగా తనను ఊరికే తేరిపార చూస్తున్నాడని ఆమె గుర్తు చేసుకుంది కూడా. 

అయితే నిందితుడైన 30 సంవత్సరాల ఆ యువకుడు మాత్రం నాలుగు సంవత్సరాల నుంచి ఆ అమ్మాయితో తనకు సంబంధం ఉందని, రతిబాద్ లో ఉండే తను సోమవారం భోపాల్ కి వచ్చానని, ఆ రాత్రి ఆ అమ్మాయి ఫోన్ చేసి పిలిస్తేనే తను కమలానగర్ కి వెళ్ళానని అక్కడ ఈ సంఘటన చోటుచేసుకుందని చెప్పుకొచ్చాడు.  ఆ అమ్మాయి అదంతా కట్టుకధని కొట్టిపారేసింది. 

పైగా 18 సంవత్సరాల అమ్మాయితో నాలుగు సంవత్సరాలుగా సంబంధం ఉండటమనేది నమ్మశక్యంగా లేదని అభిప్రాయపడుతున్నారు చాలామంది.  నాలుగు సంవత్సరాల క్రితం ఆమెకు 14 సంవత్సరాలు, అతనికి 26 సంవత్సరాలు కాబట్టి వారిద్దరి మధ్యా అప్పటి నుంచే ప్రేమాయణం సాగటం అవాస్తవమని అంటున్నారు.

ఏది ఏమైనా, తప్పు చేసి నాలిక కొరుక్కునే అవకాశం లేకుండా చేసిందా అమ్మాయి!

-శ్రీజ