Posted: 10/01/2012 10:52 PM IST

పవర్ స్టార్ పవన్ కళ్యాణ్ సినిమా వస్తుందంటే అభిమానులకు పండగే పండగ. ఆయన సినిమా కోసం చాలా మంది అభిమానులు ఎదురు చూస్తుంటారు. ప్రస్తుతం పవన్ కళ్యాణ్ నటించిన కెమెరామెన్ గంగతో రాంబాబు సినిమా ఈనెల 18న ప్రేక్షకుల ముందుకు రాబోతుంది. పూరీ జగన్నాథ్ దర్శకత్వంలో, తమన్నా హీరోయిన్ గా తెరకెక్కిన ఈ చిత్రంలో పవన్ కళ్యాణ్ తో పాటు ఆయన కుమారుడు అకీరా నందన్ కూడా ఓ పాటలో స్టెప్పులు వేశాడని టాలీవుడ్ లో జనాలు అంటున్నారు. ఈ వార్తలను బలంగా నమ్మేందుకు టాలీవుడ్ జనాలు ఓ సంఘటనను సాకుగా చూపెడుతున్నారు.

అదేటంటే.... ఈ సినిమా సారథి స్టూడియోలో జరుగుతుండగా ఓ రోజు పవన్ కళ్యాణ్ తన తనయుడు అయిన అకీరా నందన్ ని వెంటబెట్టుకొని షూటింగ్ కి వచ్చాడు. ఆ రోజు అకీరా నందన్ ని చూసిన పూరీ జగన్నాథ్ ఓ పాటలో చివరలో అతనితో స్టెప్పులు వేయించాడట. సాధారణంగా పూరీ ప్రయోగాలు చేస్తుంటాడు. అందులో భాగంగానే అకీరాతో డాన్స్ చేయించి ఉంటాడని అంటున్నారు. మరి ఆరోజు పూరీ సరదాగా స్టెప్పులు వేయించాడా లేక నిజంగానే ఆ పాట కోసం చేయించాడా అనేది మాత్రం క్లారిటీ లేదు. ఒకవేళ నిజంగానే అతని కొడుకు వేసిన స్టెప్పులు సినిమాలో పెడితే... అభిమానులకు మాత్రం డబుల్ ధమాకానే.