Posted: 04/06/2012 07:57 PM IST

తెలుగు, తమిళ, మళయాల భాషల్లో 0వ దశకంలో యువతకు కంటిమీద కునుకు లేకుండా చేసిన భామ సిల్క్‌స్మిత. ఈ భామ జీవితగాధ స్ఫూర్తితో బాలీవుడ్‌లో ‘డర్టీపిక్చర్’ రూపొందిన విషయం తెలిసిందే. విద్యాబాలన్ నటించిన ఈ చిత్రం ఉత్తరాదిలో సంచలనం సృష్టించి భారీ వసూళ్లు కురిపించింది. ఇప్పుడు అదే చిత్రాన్ని తెలుగులో రీమేక్ చెయ్యాలని శోభాకపూర్, ఏక్తాకపూర్ సన్నాహాలు చేస్తున్నారు. తొలుత విద్యాబాలన్ పాత్రలో అనుష్కని ఎంపిక చెయ్యాలని భావించారు కానీ ఆ పాత్రలో నటించడానికి ఆమె సుముఖంగా లేకపోవడంతో ఆ స్థానంలో నమితని ఎంపిక చేశారని బాలీవుడ్ వర్గాల సమాచారం.

‘డర్టీపిక్చర్’ విడుదలకు ముందు ‘ఈ పాత్రను నేను మరింత రక్తికట్టించే దాన్ని అని నమిత ప్రకటించిన విషయం తెలిసిందే. అయితే అదే పాత్రలో నటించే అవకాశం వెతుక్కుంటూ రావడంతో నమిత ఆనందానికి అవదుల్లేవట. ‘డర్టీపిక్చర్’లో విద్యాబాలన్ సిల్క్ గా జీవించిన విషయం తెలిసిందే. ఈ చిత్రలోని ఆమె నటనకుగాను జాతీయ ఉత్తమనటి అవార్డు కూడా లభించింది. ఆమె నటించిన ఆ పాత్రని నమిత ఏ స్థాయిలో రక్తికట్టిస్తుందో అని అంతా ఈ చిత్రంపై ప్రత్యేక ఆసిక్తిని ప్రదర్శిస్తున్నారని సినీ వర్గాల సమాచారం.