Posted: 01/24/2012 02:52 PM IST

సూపర్ స్టార్ రజినీకాంత్ సినిమాల్లో చేసే స్టైల్ కి ఎంత ఫాలోయింగ్ ఉంటుందో మనకు తెలిసిందే. అయితే రజినీకాంత్ నిజ జీవితంలో కూడా ఓ స్టైల్ లాంటి మ్యాజిక్ చేశాడు. అదేంటంటే... ఆయన ఈ మధ్యనే ప్రారంభించినా ఓ వెబ్ సైట్ ఇంటర్ నెట్ లేకుండానే యాక్సెస్ అవుతుంది. అదేంటి విచింత్రంగా ఉందని ఆలోచించకుండా ఈ కింది మేటర్ ని చదవి తెలుసుకోండి.

ఏదైనా వెబ్‌సైట్‌కు యాక్సెస్‌ కావాలంటే ఇంటర్నెట్‌ కనెక్షన్‌ కావాల్సిందే. రజనీకాంత్‌ వెబ్‌సైట్‌కు యాక్సెస్‌ కావాలంటే మాత్రం ఉన్న ఇంటర్నెట్‌ కనెక్షన్‌ను డిస్‌కనెక్ట్‌ చేయాల్సిందే. ఇంటర్నెట్‌కు డిస్‌కనెక్ట్‌ అయితే రజనీ వెబ్‌సైట్‌ ఎలా పని చేస్తుందని కన్‌ఫ్యూజ్‌ అవుతున్నారా? అటు ‘బాబా’ అనుగ్రహం, ఇటు ‘రోబో’ శక్తి సామర్థ్యాలు గల రజనీకి ఇదో లెక్కనా అంటూ వెబ్‌ నిపుణులు సరదాగా వ్యాఖ్యానిస్తున్నారు. అల్‌ అబౌట్‌ రజనీ పేరిట గల ఈ వెబ్‌సైట్‌ను వీక్షించాలంటే, ఆరంభంలో ఒక్కసారి మాత్రమే ఈ వెబ్‌సైట్‌కు ఇంటర్నెట్‌తరువాత యాక్సెస్‌ కావాలి. ఆ తరువాత నెట్‌కు డిస్‌కనెక్ట్‌ అయితేనే ఈ వెబ్‌సైట్‌ను వీక్షించవచ్చు.

దీని వెనుక ఏ మహత్తర శక్తి లేదు.ఉన్నదల్లా సింపుల్‌ లాజిక్‌ మాత్రమే. తొలిసారిగా ఈ వెబ్‌సైట్‌కు యాక్సెస్‌ కాగానే ఫ్లాష్‌ ఫైల్‌గా ఉండే వెబ్‌సైట్‌ మొత్తం మీ సిస్టమ్‌లోకి డౌన్‌లోడ్‌ అవుతుంది. ఆ తరువాత మీరు నెట్‌కు డిస్‌కనెక్ట్‌ కావాలి. అలా డిస్‌కనెక్ట్‌ అయ్యారో లేదో ఈ ఫ్లాష్‌ ఫైల్‌ తనిఖీ చేస్తుంటుంది. మీరు గనుక పొరపాటు మళ్ళీ ఇంటర్నెట్‌కు యాక్సెస్‌ అయితే మాత్రం ఈ వెబ్‌సైట్‌ను తిరిగి వీక్షించలేరు. మరింకెందుకు ఆలస్యం...వెంటన్‌ ఆల్‌ అబౌట్‌ రజనీ వెబ్‌సైట్‌ను చూడండి మరి... ఒకసారి కనెక్ట్‌ కాగానే ఇంటర్నెట్‌కు డిస్‌కనెక్ట్‌ కావడం మర్చిపోవద్దు సుమా... మీ అభిమాన నటుడికి, మీకు మధ్య ఇంటర్నెట్‌ మాత్రం ఎందుకు?